E luna aki ta e luna di ‘groundbreaking’, esta di anuncio di comienso di proyectonan nobo y positivo pa San Nicolas. E ta un hecho cu dia 14 di november, lo tuma luga e groundbreaking di e hotel Secrets Baby Beach Resort. Un soño cu pa decadanan a biba cerca varios persona den Gobierno y cerca hopi persona den nos comunidad. Pa hopi aña a papia di diferente proyecto, sinembargo esaki a mustra di ta dificil pa yega na concretisacion di nan. Pesey ta importante pa anuncia e informacion di mas recien caminda cu e desaroyadornan di e hotel a ricibi nan permiso pa construccion, di e forma aki nan ta conta cu tur nan permisonan necesario pa realisa e gran proyecto hotelero na San Nicolas.
Concretisando e hecho cu aki dos siman lo tin e groundbreaking oficial pa construccion di e hotel, cual den su prome fase lo consisti di 600 camber all inclusive. Mester menciona cu despues di dos aña di completacion di e prome fase, lo bay over na construccion di 300 camber EP (no all-inclusive).
Mas e dianan acerca mas comunidad y specialmente e pueblo di San Nicolas ta realisa cu e hotel realmente ta e webo di oro cu tabata en busca di dje pa tanto aña. Aworaki tin un Gobierno cu door di pone hecho tras di palabra, pueblo mes por mira e seriedad cu tin di parti Gabinete Wever – Croes pa realisacion di e gran proyecto aki cu lo ta catalisador pa otro proyectonan pariba di nos isla!