Djabièrnè 25 di òktober 2019 alrededor di 22.50’or Sentral di Polis a haña notifikashon di un kaso di tiramentu a tuma lugá den Kaya Talko i ku tin un hende heridá. Na yegada di e promé unidat polisial nan a bin topa ku un hòben di sekso femenino di 15 aña di edat, ku herida di bala na su dos pianan. Ambulans a transportá e víktima pa poliklínika di SEHOS pa asistensia médiko.
For di investigashon preliminar ku polis a realisá na e sitio a resultá, ku un ratu promé algun hòben tabata pará na un vehíkulo ku tabata stashoná den e kaya ariba menshoná. Un di e hòbennan tabatin un arma di kandela den su poder i diripiente bala a sali for di e arma ku konsekuensia ku e la heridá e hòben di sekso femenino ariba menshoná. Despues di e akto e hòben a bai skonde e arma di kandela i kore bai for di e sitio.
Kontinuando ku e investigashon na e sitio polis a haña e arma di kandela skondé den kurá di kas i a konfiská esaki. Tambe riba kaya polis a haña i konfiská huls. Investigashon den e kaso ta kontinuá.