Parlamentario Endy Croes a bishita Biblioteca Nacional diahuebs ultimo. E motor tras di e programa sr. Mirto Lacle tabata tin un show 1919-2019 un siglo di recuerdo “Rescate di Memoria”. Den e show aki a reconoce diferente artista, musico y baluarte. Un sala completamente yen di familiar y conocirnan tabata testigo di e anochi espectacular.
Inicialmente a pasa un video di Hose “Joe” Dania, un legendario di Dakota kende recientemente a cumpli 100 aña dia 6 di october ultimo. Un bunita video di Joe y su familiarnan den presencia di Joe y henter famia. Joe Dania ta tata di entre otro Ito Dania, un tumbero ganador di tumba cu su titulo “Hiep Hiep Hoera” y Joe a conta e experencia aki con e celebracion tabata e anochi particular ey. Familarnan di Hulanda tur a bini hunto pa celebra esaki cu hopi alegria manera un gran famia. Joe ta un tremendo persona cu un curason grandi pa su famia, su bario y henter e pueblo. Pabien Joe.
Alabes e musico Ronny Kock a wordo reconoci pa su añanan dedica como musico nacional y internacional. Ronny a duna presentacion masha bunita cu su grupo. Masha masha pabien na Ronny Kock y henter famia.
Taly Wever, un musico di 80 aña tambe a wordo reconoci pa su gran dedicacion como musico cu un carera briyante tanto nacional como internacional. E hobencita Jaydiene Croes a canta un cancion masha bunita pa tur presente, specialmente pa Taly Wever den un parti bastante emocionante.
Finalmente e talentoso pianista y musico Johnny Scharbaay a duna un presentacion magnifico poniendo un ambiente total cu su piano. Freddy Montoya tambe a presenta un obra masha bunita cu a “touch” tur hende den e sala.
Pabien na tur esnan cu a wordo reconoci. Pabien na e organisadornan Mirto Lacle y tambe Frank Williams y sigur Biblioteca Nacional cu a duna su aporte pa e anochi formidable y bunita aki reconociendo nos hendenan.