Parlamentario Endy Croes kier para keto un rato pa nos por reflexiona. Por a tuma nota di un grupo di sindicatonan a cuminsa uni moviendo den un direccion reclamando riba indexering. E parlamentario por recorda mesun tipo di movecion den añanan 2007 y 2008. Croes ta continua bisando cu e no tin nada contra cu sindicatonan kier busca mihor pa nan grupo cu nan ta representa. Talbes usando un documento cu Mike Eman a firma juli 2017 den porta di eleccion comprometiendo indirectamente e gobernacion cu ta continua sin tin cu nes e sostenibilidad financiero di un pais. Pero den bida tin un palabra hopi importante y esaki ta e palabra “HUSTO”. Kico Parlamentario Croes kier splica cu esaki?
Un diferencia di shelo y tera
Durante gobernacion di Mike Eman y AVP nan a endeuda e pais aki na un manera masha cruel. Pakico cruel? A crea un Mega Debe, a redobla e debe nacional cu 2200 mil miyon, esta cu 2.2 Biyon. Aruba mester paga solamente na interes den 2019 232 miyon mas 80.9 miyon na proyectonan PPP. Coalicion a hereda un pais casi bancarota cu un debe nacional di riba 90%. Siguiendo cifranan di Banco Central, AVP tabata presta anualmente pa cera un deficit financiero sumanan di 188.6 miyon (2010), 325.2 miyon (2011), 443.3 miyon (2012), 332.8 miyon (2013), 405.8 miyon (2014 =KB) etc etc. Awe den menos di 2 aña e gobernacion di Evelyn Wever Croes lo alcansa un deficit di solamente 25 miyon pa cu aña 2019 y pa cu aña 2020 di acuerdo cu e protocol lo yega un SURPLUS di 25 miyon. Un diferencia di shelo y tera.
Hulanda ta presiona
Hulanda presionando gobierno pa “massa ontslagen” di ambtenaarnan di cual e gobierno social democrata aki cu tin e hende central ta rebeldia y mustra Hulanda cu no lo tuma e decision aki. Den protocol tin firma cu gastonan di personal mester alcansa 479 miyon den 2019, pues 6 miyon menos cu 2018 di cual e gobierno ta logrando basa riba entre otro no renoba contractonan y hendenan cu bay cu pensioen no lo pone otro na nan lugar. Cifranan di CBS y Banco Central enrealidad ta indica di un inflacion di 3.6% den 2018. Cos no ta facil y ta como pueblo nos mester carga esaki.
Presionando pa indexering
Sindicatonan kier cuminsa nan movecion pa presiona gobierno pa indexering di 3.6% cual ta igual na 28.8 miyon florin. Parlamentario Croes ta puntra pueblo si esaki ta “HUSTO”? Parlamentario Croes ta puntra sindicatonan si nan timing ta esun corecto y si ta compronde e consecuencia cu esaki lo tin pa pais y relacion cu Hulanda y si esaki ta “HUSTO”? Hulanda no kier acepta ni 1.4 miyon di Social Crisis Plan on top di 479 miyon di gastonan di personal. Den bida e palabra “HUSTO” banda di e palabra “RESPONSABILIDAD” ta pisa masha hopi.
Parlamentario Croes ta spera cu nos por pone e aspecto politica un banda y mira consecuencianan di un pais pa cu su futuro generacion na promer lugar y tur contribui pa nos por saca e pais aki for di e abismo.