Solamente cuater di e 20 metanan relaciona cu biodiversidad ta canando segun skema
Un rapport publica recientemente y emití pa Reino Hulandes ta mustra riba un situacion alarmante: solamente cuater di e binti metanan di “Aichi” di e asina yama “Convention on Biological Diversity (CBD)” lo keda logra den e parti caribense di Reino. Esaki ta ilustra un nesesidad cresiente pa accionnan dirigi riba maneho di conservacion di naturalesa den e parti caribense di Reino. CBD ta un acuerdo internacional bou di e Programa pa Medioambiente di Nacionnan Uni, cu tin como obhetivo pa brinda un cuadro legal pa sostene conservacion y uzo duradero di recursonan natural, pa asina garantisa preservacion di e diversidad biologico di e paisnan cu a ratifica e acuerdo aki. Pa por logra esaki, e paisnan cu a ratifica e acuerdo a stipula un cantidad di obhetivo y meta pa promove conservacion y uzo duradero di recursonan natural conosi mundialmente como e metanan di “Aichi”. Reino Hulandes ta indica cu di e 20 metanan stipula pa 2020, cuater lo por keda alcansa na tempu, ya cu nan ta cana segun skema. E resultadonan aki ta enfatisa e nesesidad inmediato pa accion di gruponan cu ta traha pa logra conservacion y mescos tambe di entidadnan gubernamental.
Dutch Caribbean Nature Alliance (DCNA) ta mustra riba e echo cu aunke e sosten cu actualmente ta risibiendo di Hulanda ta enfoca riba Saba, Sint Eustatius y Bonaire, e islanan cu constitucionalmente ta parti di Hulanda, naturalesa no conoce frontera y p’esei ta di sumo importansia pa Reino Hulandes duna sosten na plan y proyecto pa conservacion di naturalesa di tur seis isla.
Tur partido den e tratado aki a firma e Plan Strategico Actual pa Diversidad na 2010 y e ta core te 2020. E plan ta amplia riba binti punto di referencia pa biodiversidad conosi como e ‘Metanan di Biodiversidad di Aichi’. Cada cinco aña cada pais participante , incluyendo Reino Hulandes tin di entrega un Rapport Nacional riba e status actual pa e puntonan di referencia aki. E ultimo rapport ta actualisa te cu 2018.
For di 2010 Reino Hulandes ta consisti di Hulanda, hunto cu e entidadnan publico di Bonaire, Saba y Sint Eustatius, y e tres paisnan autonomo Aruba, Corsou y Sint Maarten. Ta referi na Aruba, Bonaire, Corsou, Saba, Sint Eustatius y Sint Maarten colectivamente como e parti caribense di Reino Hulandes.
Tendencia alarmante
E rapport recien di Reino Hulandes, publica na april di e aña aki ta indica cu aunke tabatin algun progreso significante, toch lo no alcansa tur e metanan nacional na 2020. Pa e parti caribense di Reino Hulandes e menasa mas grandi pa por cumpli cu e metanan di Aichi ta entre otro: animalnan cu ta cana liber y come yerba di forma desproporcional, espesienan invasivo, piscamento for di proporcion y polucion. E menasanan aki ta haci e habitatnan riba e islanan menos resistente pa e menasa grandi di cambio di clima. Tambe e rapport ta indica cu no ta haciendo sufisiente pa atende cu e menasanan local aki.
En total tin diesseis meta di Aichi cu pa un of mas di e islanan den e parti caribense di Reino Hulandes no ta canando segun skema. Ademas, tin diestres meta cu ta progresando pa algun di e islanan, pero no na e velocidad desea. Mas aleu por a conclui cu un total alarmante di cinco di e metanan aki ta bayendo atras na e islanan, mientras cu pa 50% di e metanan no tabatin cambio significante na algun di e islanan. E cinco metanan cu ta bayendo atras ta cubri e siguiente areanan: (5) perdida di habitatnan natural, (7) agricultura duradero, (12) reduci riesgo di extincion, (14) servicio di ecosistema, (15) restauracion y resistencia di ecosistema.
Exito
E rapport a para keto tambe na algun aspecto exitoso y actualmente tin cuater meta cu ta canando segun skema pa por keda alcansa na 2020. E metanan di Aichi cu ta canando segun skema ta: (1) consientisacion tocante biodiversidad, (2) balornan di biodiversidad inclui den desaroyo nacional, local y strategia y planiamento pa reduccion di pobresa, (8) reduccion di polucion y (17) establese strategia y plannan di accion pa biodiversidad. E rapport ta haci mencion positivamente di e campañanan di consientisacion na tur e islanan. E campañanan aki ta enfoca riba e importancia pa protehe naturalesa, redusi polucion y stimula uzo duradero di recursonan natural disponibel. E tres otro metanan ta cana segun skema solamente na e islanan BES (Bonaire, Saba y Sint Eustatius).
Den hopi caso ta falta datos di monitoreo riba termino largo pa hopi di e metanan di Aichi. Esaki ta conta pa cada un di e islanan y p’esei e analisis haci tabata basa riba con e expertonan ta husga e situacion y exito di e esfuersonan tabata varia considerablemente entre e seis islanan. For di 2010 islanan BES a conose un subida den asistencia financiero y accionnan dirigi riba conservacion y probablemente p’esei nan por a observa mas mehoracion tambe compara cu Aruba, Corsou y Sint Maarten, aunke e mehoracion no tabata sufisiente tampoco.
Yamada urgente pa sostene tur e islanan.
E rapport ta mustra riba tantu e exitonan, como e fracasonan di e actual politicanan pa medioambiente y practicanan di maneho den e parti Caribense di Reino Hulandes. E seis islanan cu ta pertenece na Reino Hulandes ta parti di un asina yama “hotspot” pa biodiversidad di islanan caribense, cu ta muchu mas grandi y ta inclui refnan di coral, mondinan di palu di mangel, sierto tipo di vegetacion bou di awa, neblina tropical, selva tropical y cueba. Tur esakinan cu un nivel halto di biodiversidad (cantidad di sorto di mata y bestia). E islanan aki ta depende altamente riba salud di e ecosistemanan aki for di un punto di bista tantu economico como social. E islanan Hulandes den Caribe por logra alcansa e metanan di Aichi solamente cu sosten continuo di gruponan di conservacion local, boluntarionan público y yudansa di gobierno.
Dutch Caribbean Nature Alliance (DCNA) ta un NGO cu ta traha cu organisacionnan pa maneho di naturalesa dedica, riba e seis islanan Hulandes den Caribe. E meta ta pa protehe biodiversidad y stimula esfuersonan pa conservacion duradero di naturalesa. Cada isla tin su propio habitat unico, pero ta confronta retonan similar pa mantene e habitatnan aki protehe. Cambio di clima, capmentu di palu for di proporcion, piscamentu for di proporcion, invacion di sargassum, construccion sin limite y e efectonan di turismo di forma no-duradero ta djis algun ehempel. Colaboracion y compartimento di conosemento ta critico pa por subi e eficiencia di e esfuersonan menciona.
Por lesa e rapport completo pa Reino Hulandes aki: https://www.dcbd.nl/document/sixth-national-report-kingdom-netherlands