Por a tuma nota, atrobe, den medio di comunicacion con ex Prome minister di Aruba M. Eman, un persona cu a nenga di representa asina tanto votador cu a confi’e den Parlamento, den su afan y jaloezie contra e actual Prome Minister di Aruba, tin e tribilidad di uza cifra pa, atrobe, manipula un storia pa, atrobe, pueblo haya duele di dje y pensa cu e ta e martir di e pueblo di Aruba.
Manipulacion di uzo di informacion
Parlamentario sra. Setty Christiaans-Yarzagaray a analisa e articulo di M. Eman p’asina atrobe constata con, manera semper – pasobra ta parce cu realmente e no conoce otro manera – ta manipula den e forma di uzo di informacion p’asina pueblo haya duele di dje atrobe.
Revelacion den uzamento di informacion ta dia cu su partido realmente kere den data y haci bon uzo di dje mirando cu durante su temporada di gobernacion e mes conhuntamente cu otro minister e tempo ey, a percura pa e departamento aki cu tanto e ta uza informacion awe, no ricibi fondo pa haci investigacion y ora e departamento aki logra obtene cierto informacion, nan a make sure pa e informacion importante aki no wordo divulga.
Period Average inflation y Core Inflation
Parlamentario Setty Christiaans-Yarzagaray ta haya cu uzo adecuado y apropia di informacion ta necesario y importante y p’esey e Parlamentario ta bay dedica e parti aki pa yuda educa entre otro M. Eman kico informacion di inflacion cu el a papia di dje kiermen. Pa añanan largo CBS ta midi cambio den prijs di un cantidad di producto na Aruba y cu tur informacion compila ta midi inflacion na Aruba. Den e tabel adhunto por mira informacion di inflacion publica pa CBS riba nan website desde 2010 te cu juli ultimo di 2019. Informacion di 2010 te cu 2018 ta riba un base anual mientras cu informacion di 2019 ainda ta riba un base mensual. Por nota e “Period Average Inflation”, cu ta e indicador mas uza pa midi inflacion, pero tambe por nota un indicador cu yama “Core Inflation” cu ta wordo midi kitando algun componente of producto for di calculacion di inflacion mirando cu e prijs di esakinan ta hopi volatil. E componente cu ta kita di e calculacion di inflacion pa calcula “Core Inflation” ta entre otro cuminda y gasolin.
Efectonan di aumento di prijs di gasolin
Pues si e prijs di gasolin por ehempel ta wordo kita di Core Inflation paso e ta fluctua tanto, ta mas cu logico cu mester wak e calculacion di prijs di crudo y gasolin apart pa comprende dicon inflacion ta comporta asina y ki efecto gasolin tin pues riba inflacion. Tambe ta mas cu logico cu momento cu gasolin su prijs subi, cu esaki tin su efecto no solamente den e calculacion di inflacion pero e tin su efecto riba transporte di producto pa Aruba, pues tambe tin efecto riba productonan.
Den e mesun tabel adhunto por nota por ehempel cu mientras inflacion na 2018 tawata 3.6% cu gasolin so tawata tin un subida di 13.9%. Mientras M. Eman ta kere cu durante 2015 y 2016 tawata su forma di goberna a haci cu prijs na Aruba y calculacion di inflacion tawata na ventaha di pueblo, den e tabel aki por mira claramente con prijs di crudo y consecuentemente prijs di gasolin tawata mas abou den tur e 10 añanan di informacion den e tabel aki.
Crisis Tax y aumento di inflacion
Pa loke ta e ultimo 7 lunanan di aña 2019, mester constata cu e aumento di inflacion pa gran parti a wordo influencia debi na e aumento di prijs di gasolin y tambe gastonan di transporte di producto cu tambe tin su efecto riba productonan di cuminda. Pa loke ta trata aumento di BBO, esey a manifesta su efecto caba desde momento di su introduccion cu tawata na juli di 2018. Tabata hustamente e maneho desastroso di aumenta drastico di nos debe nacional durante 8 aña di Gabinete Eman cu a obliga e gobierno actual di aumenta e BBO, esta e BAVP (Crisis Tax) y p’asina trata di mitiga e derumbe financiero cu Mike Eman a hinca nos pais aden. Decision di introduccion di otro tipo di belasting of subida di BBO ta algo cu M. Eman tambe a hay’e enfrenta cu ne pero nunca tawata tin e durf pa haci’e.
Asina nos por constata y comprende tambe dicon M.Eman a hiba Aruba unda cu e ta. Enbes e educa su mes riba e topico aki y tur otro informacion, e ta keda mal uza, mal informa y mas ainda mal educa un pueblo, lubidando cu awentempo ta asina mas facil pa busca y comprende informacion. Ta parce cu ta su so ta kere ainda den e forma di haci politica manipulando cu informacion y mente di hende, Parlamentario Setty Christiaans-Yarzagaray a duna di conoce.