Diabierna otro siman, 25 di october, Gobierno di Aruba y Sindicatonan lo reuni riba e tema di indexering. Durante e reunion aki Gobierno lo duna un presentacion.
Manera ta conoci, desde april sindicatonan a bati na porta di Gobierno pa nan por haña indexering. Refiriendo na esaki, Gobierno na mas di un ocacion a bisa cu financieramente e pais ta dilanti retonan hopi grandi y cu no tin espacio financiero pa cumpli cu indexerig manera a wordo haci den pasado.
Pa e motibo aki, Prome Minister Evelyn Wever-Croes a duna di conoce, cu Gobierno kier pa forma e comision cu sindicatonan y e Gobierno anterior a palabra na 2014 pa mira kico ta bay haci cu indexering den futuro pasobra e sistema cu den pasado a wordo atendi cu n’e no por sigui. No ta tur sindicato kier ta parti di e comision y esaki Gobierno mester atende cu e sindicatonan.
Gobierno ta bou di hopi presion di Hulanda pa e tema di gastonan di personal cu tin cu baha y cualkier aumento di indexering ta nifica aumento di gasto di personal. Riba e puntonan aki, Gobierno a invita sindicato pa delibera diabierna 25 di October.