Diadomingo awor dia 20 di oktober 2019 Comision Accion Femenino di MEP lo tin un actividad dirigi pa crea e oportunidad pa profesionalnan riba e tereno di con pa nos forma y lanta nos muchanan por presenta e Vision Pedagogico Nacional y alabes comparti conseho ariba e tereno aki. E actividad lo ta na Club Don Bosco y lo ta di 4:00-6:30 di atardi. Entrada ta gratis.
Pakico e topico aki? Na final di e ultimo actividad cu e comision aki a organisa, un encuesta a keda realisa pa stipula cua topico e publico lo kier pa keda atendi durante e siguiente actividad. Na prome lugar a keda indica cu nan ta desea di trata e tema di ‘relacion cu y educacion di yiu’.
Despues di haci un sondeo encuanto e topico aki, Comision Accion Femenino, a dicidi pa invita e instancianan cu a traha y stipula e Vision Pedagogico Nacional pa Aruba. Un di e aspectonan cu sigur nan kier promove den bienestar di e muchanan, ta e lantamento di mucha riba un forma positivo. Ta trata 5 diferente organisacion, esta Departamento di Asunto Social, Fundacion Pa Nos Muchanan, Stg. Wit Gele Kruis Aruba, Fundacion Respeta Mi y Tienda di Educacion. E organisacionnan aki ta traha diariamente cu mayornan y tin como tarea pa sostene mayornan cu nan pregunta y problemanan riba tereno di lantamento di mucha. Pa formula e vision pedagogico, e comision a haci uzo di diferente fuente di informacion, manera literatura, entrevista cu hobennan, encuesta cu mayornan y profesionalnan, cifra di diferente instancia y experiencia diario.
E Vision Pedagogico ta consisti di seis punto basico den lantamento di mucha. Pa medio di e seis puntonan basico aki nan kier conscientisa e comunidad di Aruba tocante e importancia di pone nos muchanan central, e importancia di e derecho di nos muchanan y di e papel importante cu mayor, educadornan y henter nos comunidad tin den e lantamento di nos muchanan na Aruba.
E 6 puntonan basico ta: 1. Lanta yiu den un ambiente sigur y cu amor, 2. Sosten positivo, 3. Expectativa realistico, 4. Disciplina positivo, 5. Cuida bo mes bon, 6. Busca sosten y ayudo.
Pa medio di e Vision Pedagogico kier logra cu na Aruba un mayor ta percura pa nan yiu por crece den un ambiente pedagogico optimal, den un famia afectivo y stabiel y den un bario cu ta tene cuenta cu mucha.
Segun e profesionalnan cu lo tey diadomingo awor, pa medio di educacion positivo (sostene, stimula y guia) un mayor ta guia nan yiu mas miho posibel den nan desaroyo pa bira adulto. Hopi importante ta cu e mucha ta sinti seguridad emocional, ta desaroya su habilidadnan social y personal, ta haya chens pa siña norma y balor y por hunga un rol activo den un comunidad multicultural.
Diadomingo awor dia 20 di oktober bo ta keda invita pa bin scucha mas di e Vision Pedagogico aki, haya tips y tools cu lo por yuda bo den bo trabou como mayor, educador of famia (wela/welo/ tanta of omo). Lanta un mucha ta responsabilidad di nos tur!