E edificio pa gran parti a keda restaura den su estado monumental
“Awe a tuma luga e entrega di e edificio di Bestuurskantoor cu a wordo restaura como monumento den su gloria original. Esaki ta nos legado pa nos futuro generacionnan”, tawata palabranan di alegria y satisfaccion expresa pa Prome Minister Evelyn Wever-Croes.
Diaranson atardi a tuma luga na Bestuurskantoor e entrega di e edificio di Bestuurskantoor den presencia di Prome Minister, coleganan Minister, Parlamentarionan, representantenan di Monumentenfonds, representantenan di DOW y personal di Bestuurskantoor.
Un di e prome decisionnan di Gabinete Wever-Croes na principio di Gobernacion tawata pa restaura e edificio di Bestuurskantoor despues cu a realisa e estado di decadencia total cu esaki a wordo encontra y a wordo afgekeurd pa DOW. Bestuurskantoor ta consisti di 4 parti, A,B,C y D. E prome fase di trabounan, A,B y C a keda cla y por bisa cu e edificio pa gran parti a keda restaura den su estado monumental. E restoracion di e parti D, cu ta e parti cu ta conecta cu e edificio di Parlamento, lo continua pa asina esaki tambe keda den su estado original mas tanto posibel.
Prome Minister diaranson atardi den conferencia di prensa despues di e ceremonia di entrega, a gradici Minister di infrastructura, Otmar Oduber, kende cu su dinamismo a guia e trabounan cu mester a wordo haci pa logra cu e edificio a wordo entrega mas lihe posibel. A gradici tambe Minister di Finansa, Xiomara Ruiz-Maduro cu a haci lo posibel pa e Proyecto aki a wordo realisa y cada Minister cu a pone di nan banda pa corta den e presupuesto di nan ministerio y pone e placa pa e Proyecto di restoracion aki. Y tambe, Prome Minister a gradici Monumentenfonds y DOW cu a percura pa mantene e edificio historico den su forma original y haci’e un monumento.