Minister di Infrastructura sr. Otmar Oduber conhuntamente cu Director di DOW diamars atardi a anuncia cu ta habri e rotonde na Noord. Esaki ta forma parti di e hecho cu poco poco ta yegando mas cerca di e availability date di e proyecto Watty Vos Blvd.
Comunidad por a mira y experiencia cu ultimamente cada siman tin mas alivio den e presion di trafico. Esaki ta debi na camindanan cu ta termina y rutanan cu ta bira accesibel. E trabou cu a tuma luga na e sitio (Rotonde Noord) tabata uno grandi pa cual cada biaha cu awa a yobe, el a accentua puntonan di atencion, cual a haci cu adaptacionnan a keda wordo haci pa e trabou por keda bon. Na dado momento despues cu e duiker a cay durante construccion, mester a prolonga e habrimento di e rotonde pa drecha e duiker completo.
Pa locual ta mantenimento, Minister Oduber a splica cu: ‘Mota Engil ta esnan cu lo ta encarga pa mantene e proyecto pa e proximo añanan, cual ta encera e marcacionnan riba caminda pa e keda visibel pa nos automobilistanan. Ta spera cu aki dos pa tres siman lo por habri e Avenida completo, despues fin di aña percura pa e parti di embeyecimento cu mester tuma luga.’
Kico comunidad por spera?
Pa resumi, den e proximo simannan comunidad lo bay experiencia un alivio grandi den trafico, cual pa mas cu dos aña caba a bin ta sufriendo hopi. DOW cu na varios ocasion tabata topico di discusion di pueblo, hopi bes a reuni y evalua con por suavisa e presion cu comunidad tabata sinti. Pesey den nomber di Gobierno di Aruba y DOW, ta gradici comunidad pa e comprension cu tabatin den e proceso di construccion.