Tratamento di ley di Serlimar den Parlamento posponi pa diaranson awor
Dialuna mester a tuma luga tratamento di ley di Serlimar den Parlamento, sinembargo esaki a keda posponi. Minister Otmar Oduber a comunica esaki indicando cu den fin di siman a wordo acerca door di Parlamento cu e peticion pa haya un poco mas tempo. Diabierna Ministerio di Desaroyo teritorial, Infrastructura y Medio Ambiente a contesta practicamente tur e preguntanan haci door di Parlamento cual tabata mas o menos 34 pagina di pregunta. Esaki ta significa cu Parlamento a ricibi masha hopi documento cual ta mustra e transparencia cu tin di parti di Gobierno.
Minister Oduber a splica ampliamente cu varios di e documentonan cu a wordo entrega recientemente na Parlamento, ya a wordo entrega den pasado. Na juli por ehempel, riba preguntanan di Parlamentario Daphne Lejuez, a manda tur e jaarrekening nan cu tabata core atrasa desde 2011. Pues den menos cu dos aña den Gobernacion, a percura pa entrega te cu 2015. 2016 ta den su fase final pa wordo aproba door di Raad van Toezicht. Y e jaarrekening nan di 2017 y 2018 ya caba ta den nan fase di concepto, pa por logra realisa esakinan tambe na cuminsamento di otro aña. Pues den un periodo di dos aña a percura pa tur esakinan keda cla. Dicon esaki ta importante, ta pa motibo cu cu a traves di e documentonan aki por ilustra con e compania a opera financieramente, pa por traha un ‘business plan’ di e compania. Cual ta netamente locual cu ta tumando luga. A pesar cu Serlimar no tin un business plan, a percura pa traha un plan di maneho pa 2018 y 2019 cual tambe a wordo manda pa Parlamento.
Pues a base di e gran cantidad di documentonan cu Parlamento a haya for di Gobierno cu a mustra transparencia den e tratamento di ley di Serlimar, nan a pidi e disponibilidad di Gobierno den e caso aki pa conduci e reunion diaranson dos di October pa 9or di mainta.