Den bon acuerdo cu propietarionan di e borchi di I LOVE ARUBA y DOW, Dialuna a cuminsa cu e trabounan pa desarma e borchi pa muda esaki, e trabou lo finalisa den transcurso di e siman.
Dialuna mainta Minister Otmar Oduber conhuntamente cu director di DOW y Omar – Steve Lejuez como propietario di e borchi di I LOVE ARUBA, a informa di e cambionan tumando luga pa locual ta e localidad nobo di e borchi di I LOVE ARUBA. Ya pa 3 siman a cuminsa cu e contactonan entre DOW y e propietarionan di e borchi, cu algun aña pasa a ricibi permiso pa e wordo poni dilanti Bestuurskantoor.
Rason cu a cuminsa cu e combersacionnan pa re aloca e borchi ta, primordialmente pasobra manera comunidad por a tuma nota ta, cu ya pa 1 aña y mey tin renobacion andando na edificio monumental cual ta e Bestuurskantoor. Den cuadro di esaki, e monumentenverordening ta stipula cu no por tin tipo di articulonan cu ta obstrui e bista di e monumento.
Minister Oduber como un persona cu semper a sostene y pusha turismo, sigur ta apoya y e promocion di Aruba den tur sentido. Pa cual tabatin bon alternativa manera entre otro a considera sitionan alternativo pa ubica e borchi, manera den caya, dilanti Djispi entre otro. Finalmente, diabierna siman pasa a yega na acuerdo cu e borchi lo wordo muda pa Welcome Plaza. Eynan lo tin espacio pa busnan por para y bishitante por saca potret mas comfortabel cual ta dificil dilanti di Bestuurskantoor.