ORANJESTAD – Gerencia di WEB ARUBA a tuma nota di publicacionnan den medionan cu ta critica cu no a duna trabou na contratistanan local pa lo cual ta trata construccion di planta RECIP FASE IV. Pa medio di esaki ta desea di declara lo siguiente.
WEB Aruba a firma un contrato cu e compania internacional Wärtsilä. E compania aki tin e responsabilidad final pa entrega un proyecto di acuerdo cu exigencianan contractual. Segun e contract cu WEB Aruba, Wärtsilä tin su procedura formal pa selecta subcontratistanan cualifica. Ademas Wärtsilä y su subcontratistanan selecta mester cumpli cu e condicionnan di e contract entre otro pa lo cual ta garantia, calidad y entrega di e proyecto na tempo. Ademas mester cumpli cu leynan di Aruba, entre otro laboral, fiscal y e permisonan necesario. WEB Aruba ta vigila cu e seleccion di subcontratistanan door di Wärtsilä, ta cumpli cu e condicionnan ariba menciona.
E trabounan di e proyecto RECIP IV ta consisti di tres parti: e parti di trabounan civil (fundeshi, infrastructura y drenahe) cual ta cay bou di encargo di WEB Aruba, e parti di trabounan di interconexion cu e plantanan existente (coriente y tuberia), cual tambe ta cay bou di encargo di WEB Aruba, e trabounan di construccion y instalacion di e planta central (motornan, transformer, generator etc.) di RECIP IV ta cay directamente bou di encargo di Wärtsilä.
Pa tur e trabounan cu ta cay bou di encargo di WEB Aruba, a tene y lo tene destaho, caminda contratistanan local a y por participa. Tin dos compania local cu ya a wordo contrata pa e trabounan civil. Falta e destaho pa e trabounan di interconexion cual lo sali pronto. Aki tambe ta conta cu contratistanan local lo mester cumpli cu tur e exigencianan ya menciona, esta cu e condicionnan di e contract y leynan di Aruba, entre otro laboral, fiscal y e permisonan necesario.
Concluyendo, gerencia ta expresa cu debidamente WEB Aruba ta consciente di e situacion laboral di contratistanan local. Asumiendo su responsabilidad WEB Aruba, caminda por, ta haci uzo di labor local cualifica. Esaki ta mas importante ainda pa un proyecto asina significativo manera RECIP FASE IV, cual lo mester contribui na un produccion di energia confiabel, pagabel y sostenibel riba cual nos isla, nos ecomomia y nos comunidad ta depende.