Home Sports Buscando clasificacion den CONCACAF Nations League, Aruba ta enfrenta Guyana diabierna awor...

Buscando clasificacion den CONCACAF Nations League, Aruba ta enfrenta Guyana diabierna awor na Corsou

SHARE

ORANJESTAD, Aruba: E seleccion nacional di Aruba a biaha pa Corsou pa hunga den e campeonato di CONCACAF Nations League. Den e siguiente simannan e seleccion nacional lo hunga 2 wega den September, October y November. E seleccion a bula pa Corsou ey topa cu Guyana.

Diabierna awo e seleccion nacional lo enfrenta Guyana dia 6 di September na Corsou, despues ta regresa Aruba pa algun ora pa por biaha pa Miami y sigui pa Antigua pa hunga dia 9 di September contra Antigua & Barbuda. E programa ta pisa, asina Maarten Koopmans, entrenado di nos ekipo nacional, a expresa.

E ekipo nacional tabata consisti di un grupo grandi, pero varios hungado clave a cay afo, habriendo oportunidad pa talentonan hoben mustra kico nan tin aden riba un nivel mas halto. E Seleccion Nacional ta hunga pa di dos biaha den e campeonato di Nations League. E lo ta dificil pa motibo cu e hungadonan lo mester pidi hopi dia liber na nan trabou. Aruba ta den un “poule” fuerte cu desafionan bunita, asina Maarten Koopmans a indica.

Tambe pa motibonan di lesion tin hungadonan cu no lo ta presente. Pa e entrenado, tin varios obstaculo pa surpasa, por ehempel e hungadonan mester a pidi 10 dia liber di nan trabou den luna di september, atrobe den october y despues den november tambe. Esey ta pone cu ta masha dificil pa por haya tur hunto pa train den seleccion. A probecha durante henter luna di Augustus pa train e seleccion y esey a bay bon. E hungadonan di Hulanda a yega dia 2 di September na Corsou caba, pa asina henter e famia di futbol por topa otro.

E CONCACAF Nations League ta un competencia internacional, den cual ekiponan nacional di mucha homber, afilia na CONCACAF, ta participa. CONCACAF ta e organisacion regional di Norte America, Central America y Caribe. Tin 41 ekipo participando den e campeonato cu automaticamente ta bira cualificado pa e CONCACAF Gold Cup.