E siman aki, Gobierno di Aruba a tuma despedida di CEO di Aruba Airport Authorities AAA Señor James Fazio y a brinda bon bini na e CEO nobo Señor Meijs. Den su discurso e anochi aki, Prome Minister Evelyn Wever-Croes a subraya e decision strategico asina importante cu e Minister encarga cu turismo na 2004, sr. Edison Briesen, a tuma pa cera e partnership cu Schiphol Groep.
“Hunto cu Schiphol Groep y AAA a hiba nos aeropuerto na e siguiente nivel, y awe nos por bisa cu siguridad cu e vision strategico di Gobierno di sr. Nelson Orlando Oduber na 2004, tabata un bon vision. Awor AAA ta den pleno ehecucion di e proyecto di $300 miyon “Gateway 2030”, cu lo genera crecemento economico, lo genera cupo di empleo y lo haci di nos aeropuerto e hub den nos region”, Prome Minister a enfatisa.
AAA a inicia e Proyecto di expansion Gateway 2030 cu ta crucial pa e desaroyo di nos pais y garantisa e exito di e implementacion di nos vision. Señor Fazio, kende tawata CEO di AAA pa e ultimo 5 añanan, tawata e motor tras di proyecto importante aki pa nos pais. E proximo CEO, Señor Joost Meijs, lo tuma over e responsabilidad pa guia e desaroyo di maneho, organisacion y mantene contacto cu e stakeholders como tambe pa e inversion di 300 miyon dolar aki.
“Awe nos ta despedi di un CEO di Schiphol Group, Señor Fazio y na mes momento nos ta duna bon bini na Señor Joost Meijs. Den nomber di Gobierno di Aruba, Hunta di Directiva, staff y empleadonan di AAA, usuarionan y nos comunidad, y como Prome Minister, mi ta gradici Señor Fazio pa su apoyo continuo pa haci di nos aeropuerto E Hub den nos region. Nos ta desea Señor Fazio exito den esfuersonan nobo. Na e CEO nobo, Señor Meijs, nos ta desea tur cos bon y exito sperando pa traha hunto cu Señor Meijs y su personal pa asina hunto logra metanan pa nos pais”, Prome Minister a expresa.