ESPECIALMENTE DEN ALIANSANAN CU UNIVERSIDADNAN NA MERCA PA NOS STUDIANTENAN DI ARUBA
Durante su bishita cortico na Aruba, Minister Plenipotenciario Joselin Croes a tuma e oportunidad pa comparti cu pueblo di Aruba su trabou como Minister Plenipotenciario pa Aruba na Merca. Tambe Minister Plenipotenciario Croes a update Conseho di Minister di tur su trabou y logronan especialmente pa studiantenan di Aruba.
Minister Plenipotenciario Joselin Croes ta posiciona na embahada di Reino Hulandes na unda e tin 80 colega di cual mayoria ta Hulandes trahando pa Hulanda riba sectornan di innovacion, economia, relacion exterior, maneho di awa, agricultura y salud.
Minister Plenipotenciario Croes ta reporta directamente na Minister President di Aruba Evelyn Wever-Croes y ta traha cu un presupuesto cu mester wordo aproba tur aña pa Parlamento. E ekipo di Aruba na Washington ta consisti solamente di Minister Plenipotenciario y un asistent cu ta traha 50% pa Aruba y 50% pa Corsou, dus un ekipo chikito eherciendo tur e trabou necesario pa Aruba y logrando cosnan grandi especialmente den aliansanan cu universidadnan na Merca pa nos studiantenan por haya descuento riba e schoolgeld.
Señora Croes a duna di conoce cu e relacion cu embahador na Washington ta uno hopi bon y positivo. Algo hopi positivo y bon pa nos pais ta cu despues di hopi tempo, luna pasa embahada a hisa e bandera di Aruba, Corsou y Sint Maarten banda esun di Hulanda cu ta un muestra di e aprecio cu embahada tin pa cu e islanan.
“E yudansa cu e islanan ta haña tambe ta uno grandi especial riba e tema di Venezuela ya cu esaki ta toca henter Reino Hulandes. Mirando tambe cu e ekipo ta uno chikito, ta habri oportunidad tur aña pa tuma 2 stagaire pa bin stage na Washington. Mi ta a invita tur studiante cu ta den nan stage periode pa manda nan aplicacion pa mi pasobra ainda mi ta buscando stagaires pa 2020”, Minister Plenipotenciario Joselin Croes a duna di conoce.