Cullinan, Petroria, Zuid-Afrika: Diamars ultimo a tuma lugar un drama horibel, na Mahala View Lion Lodge na e parti oost di Pretoria. Doño di e Lodge aki a wordo cruelmente mata pa su mesun leonnan cu ela cria for di chikito.
Esaki a sosode na momento cu e doño di e Lodge Leon Biljon tabata drechando e hekie unda e bestianan nan ta cera. E vocero di polis di Cullinan a confirma cu Leon Biljon di 70 aña a fayece tragicamento despues di a wordo ataca y mordi pa su tres leonnan. Bisiñanan a trata na yuda e victima pero lamentabelmente ela muri na e heridanan grave cu ela ricibi.
E vocero di polis a informa prensa cu autoridad a laga pone tur tres leon drumi.
Leon Biljon tin un Lodge caminda e tabata cuida tres leon Rambo, Nakita y Katryn. Leon tabata host turista y tabata dunanan informacion di leonnan y tambe tabata organisa jacht pa animalnan salvahe.
Na Zuid-Afrika tin mas di 200 Lodge, caminda ta cria leonnan, esaki ta en total entre 6 mil pa 8 mil Leon cu ta wordo rasa y cria den e tipo di boerderijnan aki y cu ta biba den cautivo.