Parlamentario Endy Croes durante reunion publico den Parlamento a trece dilanti entre otro e manera abusivo di maniobra di dirigentenan di AVP. Nos por a tuma nota cu AVP no a keda contento cu Gobierno actual a reconoce e trabounan duro di Nelson Oduber den su trayectoria y a nombra Sasakiweg na su honor cual desde dialuna ta yama Avenida Nelson Orlando Oduber. Mike Eman a core bay bishita Watty Vos den santana algun dia atras. Mike den entrevista cu Patrick Paskel den Santana a critica na un manera feroz e escogencia di gobierno pa cu e nomber nobo di Sasakiweg. Net un Patrick Paskel cu Mike Eman a regala 7 MIYON na propaganda na un manera hopi inhusto.
Lobo den cuero di carne
Ta un secreto publico cu Mike Eman y Henny su ruman tin un odio sin ningun motibo riba Nelson Orlando Oduber, un homber integro, intachable kende na 4 ocasion a sirbi e pais aki como promer minister y un trayectoria di 36 aña den politica. Parlamentario Endy Croes a sigui bisa cu Watty Vos a lanta den MEP y a aparece number 2 riba lista di MEP. Aunke cu den transcurso di añanan Watty Vos a lanta su propio partido RUBA semper Watty a keda bon amigo di MEP cu un respet y aprecio. Despues Henny Eman a lobby cerca Watty y a tuma diferente candidato di RUBA den AVP den un etapa nobo di politica. Pues nunca Watty tabata AVP di curason. Mike Eman ta manera un lobo den cuero di carne.
AVP ta inconfiabel
Parlamentario Endy Croes a continua splicando cu Famia Eman y AVP no kier a ni paga pa entiero di defunto Watty Vos. Desde januari 2001cu Watty a fayece gobernacion di AVP na mando e momento ey nan no kier a paga aunke na dos ocasion a haya carta di funeraria pidiendo pa cancela esaki. Parlamentario Endy Croes durante reunion publico a saca e carta aki pa asina mustra Parlamento claramente cu ta momento cu pueblo a core cu AVP na september 2001 y cu ta den aña 2002 e gobierno nobo di MEP a cumpli cu e responsabilidad y a paga e entiero di un politico grandi manera Watty Vos. P’esey AVP ta un partido cu no ta di confia. Nan ta papia un cos pero ta manipula y haci otro cos.
KB riba Watty Vos
Esnan cu conoce rapport Koerten (1994) por mira claramente cu eyden ta para cu ta riba peticion di Henny Eman na Hulanda a laga pone un KB riba Watty Vos. Asina AVP ta trata su hendenan di confiansa y su candidato number 2 di partido. Esaki ta e berdad sunu. Con ta posibel cu awor Mike Eman ta bay haci bishita den Santana cu un cara di coco y un cara de que yo no fui. Tristo pero esaki ta e puro berdad. Henny Eman y gang di AVP a bay bebe den un bar y crioyo bisa laba man despues di entiero di Watty y ey si gobierno a paga Afl.15 mil pero entiero mes AVP no kier a paga. Adhunto Parlamentario Endy Croes ta publica e carta dirigi na Nilo Swaen e tempo aya pidiendo pa paga e cuenta unda MEP si a cumpli cu responsabilidad y a paga esaki. Pueblo ta bon nos siña nos hobennan primordialmente kende ta AVP y pa nan keda leu di AVP y nunca pero nunca mas duna AVP un sosten, Croes a termina bisando.