ORANJESTAD – Dialuna atardi Minister Ruiz-Maduro tabata presente na un acto special na unda Gabinete Wever-Croes a brinda honor na sr. Nelson Orlando Oduber como un Arubiano cu a dedica 36 aña na politica di nos Pais y cu durante su trayectoria a haci hopi pa nos Pais. Un di e proyectonan realisa pa sr. Nel Oduber ta e construccion di Sasakiweg cu e meta pa desaroya infrastructura pa asina trece desaroyo turistico riba un tereno di 100 hectare. Cu tempo e vision aki di Nel a concretisa y awe e area di Sasaki ta conta cu un desaroyo turistico y comercial cu cada dia ta crece mas.
Pa recorda e legado importante aki y brinda honor na sr. Nel Oduber su dedicacion inigual na desaroyo y bienestar di Pais Aruba, Gobierno di Aruba ta nombra Sasakiweg como Avenida Nelson Orlando.
Masha pabien na Nel y famia cu e bunita homenahe aki y danki pa sirbi nos Pais na un manera ehemplar y integro. Bon Bini na Avenida Nelson Orlando Oduber.