A tuma nota di un articulo publica den cual ta bisa cu Gobierno lo a tolera pa por benta sushi den un buraco grandi na Moko den caso di e restonan di Bushiri. Pa cual director di DOW Marlon Croes ta reacciona riba e ponencianan den e articulonn aki. Mester enfatisa cu den e proyecto cu a tuma luga di ‘sloop’ ex Bushiri Hotel, diferente medida a tuma luga y den e caso aki, Van den Broek tabata e contratista cu a sloop Bushiri Hotel.
Pa a realisa e trabou aki, a haci un RIE, cual ta un Risico Inventarisatie Evaluatie di e materialnan cu tin na ex Bushiri hotel. Pa di e forma aki determina cua ta e materialnan cu ta peligroso pa salubridad publico. A base di esey a dicidi riba e medidanan cu a tuma pa atende cu ne. Por ehempel na Bushiri tabatin asbest y conhuntamente cu Directie Technische Inspecties (DTI), Directie Natuur en Milieu (DNM) y Dienst Volksgezondheid (DVG), a traha un planificacion di trabou di cual e contratista Van den Broek, lo mester a remove e asbest aki, y materialnan cu por ta dañino pa nos salubridad. Un proceso concreto a wordo haci y banda di cu DOW a supervisa e trabou, tabatin profesional tecnico di sector priva cu tabata specialisa riba ‘asbest verwijdering’, cu a guia e proceso pa Van den Broek, sr. Croes a splica. Conforme procedura a empaketa esakinan den material cu ta seya nan, deposita den container y hiba Parkietenbos, unda cu tambe a deshaci di esakinan conforme procedura.
Pa loke ta trata e ‘bouw puin’ cu a keda, esaki tambe mester a wordo hiba Parkietenbos. Sinembargo e contratista den inicio no a haci esaki. Segun sr. Croes unabes cu a descubri cu nan a hiba esaki na Moko den forma ilegal, a reuni cu e contratista pa cual a hala su atencion y a splike di e consecuencia cu esaki por tin p’e. E contratisa mester a coregi e situacion y percura pa e bouw puin wordo hiba Parkietenbos.
Sr. Croes a enfatisa cu den cuadro di e maneho nobo cu tin di Minister di Infrastructura, no ta permiti pa tin sitionan di dump ilegal. Esey ta trece cu ne cu tur cos mester wordo hiba pa Parkietenbos, como e dump apunta legalmente. Den trabou (sloop werk) diario di DOW, esaki ta wordo haci y materialnan dañino ta wordo hiba Parkietenbos. Materialnan cu por wordo reuza ta wordo hiba na e ‘depot’. E Depot ta na Gavilan, unda cu ta saca granito, pa cual Minister encarga cu Infrastructura Otmar Oduber a anuncia, cu tur cobamento mester para na Aruba y a duna un un periodo pa companianan ‘bouw af’. Cu e meta pa comienso di 2021, no tin mag di tin cobamento mas na Aruba pa sector priva y tampoco Gobierno. E team di DOW ta haciendo estudio den regio pa mira unda por haya materialnan cu por substitui granito pa por cera e operacion di coba granito pa 2021 na Aruba. Pesey aworaki DOW ta uza Gavilan como un sitio pa warda material/ articulonan cu ta reuzabel, sr. Croes a finalisa.