Lider di Fraccion di POR den Parlamento, Marisol Lopez-Tromp na inicio di e luna aki a manda un carta pa ministernan Otmar Oduber y Xiomara Maduro cu un serie di pregunta relaciona cu
fondonan pa careteranan y infrastructura.
Den e carta aki e ta haci un serie di pregunta relaciona cu e dos areanan importante aki pa desaroyo di nos isla y ta indica cu lo ta di vital importancia pa bin cu un Wegen en Infrastructuur FOnds (WIF), manera a conoce den pasado na momento cu Lopez-Tromp tabata minister di Infrastructura pa medio di cual a logra traha hopi caminda cada aña y cu lamentablemente a wordo para durante Gabinetenan Eman.
Consecuencia di esaki ta cu no tabatin un forma structura y eficiente pa por dedica na e inversion di mantencion, renovacion y construccion di careteranan y su infrastrucura. Lamentablemente hopi caretera a bay atras y nunca a dedica e fondonan necesario pa evita esaki.
Cu un Fondo di Caretera, WIF, Pais Aruba por conta cu fondonan aproba y predetermina cu ta wordo dedica specificamente pa catertera y infrastrucura. Logrando esaki e instancianan concerni por traha na un forma structural y segun un schedule riba e mantencion, renovacion y construccion di careteranan y nan infrastructura segun e necesidadnan di cada area.
Manera Lopez-Tromp ta bisa, e desaroyo di e parti aki ta hopi importante y ta forma parti integral di un desaroyo economico. “Un desaroyo economico sin cu e bay pareu cu un desaroyo di nos careteranan y nos infrastructura no lo ta esun di mas optimal y lo por wordo afecta hopi lihe. Ademas, Gabinete Wever-Croes su meta principal ta pa pone nos hendenan central y parti di dje tambe ta nos careteranan y infrastructura, ya cu e ta contribui hopi na mehora y eleva e calidad di bida di nos hendenan, sin laga afo e parti di salud, siguridad y nos medio ambiente”.
Teniendo na cuenta e puntonan aki, lider di Fraccion di POR den Parlamento ta pidi Gobierno pa reinstitui e WIF logrando asina un suma fiho pa e inversionnan necesario wordo realisa.
Marisol Lopez-Tromp finalisando a recorda e ministernan Oduber y Maduro cu e ta en espera di e contestanan por escrito di e serie di preguntanan manda pa nan relaciona cu e temanan di caretera y infrastructura.