Turismo di Aruba ta pasando den su mihor momentonan den historia di nos pais. Minister Dangui Oduber ta sumamamente contento y satisfecho cu e resultadonan di aña 2018 y sigur tambe pa loke ta trata e promer seis lunanan di aña 2019.
Tur e indicadornan hotelero a ta positivo y esaki ta confirma cu e maneho di minister Dangui Oduber ta dunando resultado desea. Cu un vision dirigi riba upgrading, dirigi riba calidad, dirigi riba diversificacion ta wordo demostra por medio di indicadornan cu e maneho ta uno exitoso. Manera ta conoci e maneho di minister Oduber ta dirgi riba turistanan di calidad y turistanan cu tin un spending capacity hopi halto riba un entrada anual di mas cu $150.000 pa aña. Pa por acapara e turistanan aki ta importante pa nos tin acomodacionan di calidad, pa nos tin nivel halto di servicio y pa nos tin un producto di calidad. Den e cuadro aki hotelnan ta invertiendo miyones di florin den upgrading di nan acomodacionan. Ministerio di Turismo ta enfoka riba e Aruba Certification Program pa duna un miho servicio na turistanan. A pone como target cu kier certifica 1000 empleado den sector turistico pa aña. Na e momentonan aki e boardwalk di Malmok ta den pleno construccion. Otro luna e Proyecto di Baby beach lo cuminsa caminda lo bai inverti un suma cuantioso pa amplia e beach, crea parking spaces, bin cu restaurant, kiosko y otro facilidadnan. Otro aña e siguiente proyecto lo ta esun di mehoracion di e beach na Bushiri. Otro bunita proyecto pa comunidad haci uso di dje.
Den luna di juni grado di occupacion tawata 82.9% y cu esaki un grado di occupacion mas halto den henter Caribe. Banda di e grado di occupacion e REV PAR den luna di juni conoce un crecemento di 8.3% den comparacion cu luna di juni 2018. E REV PAR den juni 2019 tawata $193.07. E REV PAR ta un indicador sumamente imporatante pa midi e calidad di turistanan cu ta bin Aruba. E REV PAR ta e prijs cu un turista ta dispuesto pa paga pa un camber pa anochi. Nos como pais mester ta content cu e hecho cu nos tin un di e REV PAR mas halto den Caribe. Na momento cu bo tin un REV PAR asina halto e ta bisto cu turistanan di calidad ta yegando nos pais. E maneho di minister Dangui Oduber a wordo demostra cu e ta dunando resultado treciendo e turistanan cu ta laga mas placa den nos economia.
Otro indicador hopi importante ta e ADR (average daily rate) cu tambe a conoce un aumento di 4.1%. E average daily rate den luna di juni 20919 ta $232.96.
E resultadonan di luna di juni ta confirma cu Aruba su Turismo ta sigui crece y sigui desaroya cu bishitantenan nobo.
Minister Dangui Oduber kier a gradici tur e empleadonan den Turismo, tur e stakeholdersnan cu un resultado asina bunita pa e promer seis lunanan di aña 2019.
Aruba ta keda un diamante den Caribe, nos Turismo ta keda nos unico pilar y driver economico y pesey nos tur mester percura pa nos mantene nos calidad y nivel di servicio. Enbes cu nos purba questiona y critica nos Turismo nos mester yuda fortalece.