Recientemente a tuma luga na Aruba un training pa inspectornan di Directie Luchtvaart Aruba cu ta quualifica pa e Plataforma di inspection di rampa Europeo (SAFA). E training aki a wordo duna door di instructornan di autoridad di aviacion di Hulanda y Francia. E training tambe a wordo atendi door di inspectornan di Martinique y Sint Maarten como parti di e programa di coperacion cu e paisnan aki. Como parti di e coperacion aki tambe a efectua diferente inspectionnan di rampa en conhunto na nos Aeropuerto.
SAFA (Safety Assessment of Foreign Aircraft) ta un metodo standarisa pa haci inspeccion di rampa riba avionnan di otro pais cu ta na un aeropuerto. Durante e inspeccion aki, tanto e avion como su documentonan ta wordo inspecciona rigidamente segun un metodo standarisa. E discrepancianan haya ta wordo registra den un ‘database’ cu ta wordo comparti cu otro paisnan cu ta forma parti di e SAFA netwerk. Na cuminsamento e netwerk aki tabata consisti di tur paisnan di Comunidad Europeo, sinembargo awor e netwerk ta consisti di 48 pais, incluyendo Canada y Australia.
Aruba tin tres inspecteur cu a wordo cualifica pa SAFA y Aruba pronto lo uni su mes na e netwerk aki, como prome pais den Caribe. Esaki ta un proyecto di hopi aña cu pa fin di e aña aki lo wordo culmina. Bentahanan ta, entre otro, cu informacion ta wordo comparti entre tur e paisnan, na unda cada pais lo dispone di hopi mas informacion. Pa cu esaki e supervision aereo lo por tuma luga hopi mas efectivo y mas eficiente. Ta pa prome biaha cu un training den conhunto asina ta tuma luga den Caribe, loke ta encera cu ta spaar gasto pa tur e paisnan envolvi.
E proyecto aki ta parti di e maneho di Directie Luchtvaart y Ministerio di Transporte, Comunicacion y Sector Primario pa expande y fortifica a capacidadnan di Directie Luchtvaart y mehora e nivel di siguridad aereo den nos region, pa medio di coperacion y door di crea oportunidadnan di bentaha mutuo (“win-win”).