DEN HAAG – Manera ta conoci, e siman aki e reunionnan di IPKO na Hulanda lo inicia diamars awor y Parlamentario Sue-Ann Ras (MEP) tambe ta forma parti di e delegacion di Aruba. Esaki Parlamentario Ras ta considera como un bon experiencia y instrumento pa comunicacion directo y encuentro personal entre e miembronan di Parlamento den Reino.
REUNION BIPARTIET
Mientras cu e reunionnan oficial mes di IPKO ta inicia diamars, for di dialuna caba e delegacion di Aruba ta ‘mira accion’, unda ta inicia cu e reunionnan BiPartiet, en bes di uno TriPartiet, entre Aruba y Corsou, ya cu St. Maarten e biaha aki no por ta presente na Hulanda, debi cu e ta pega cu e reunionnan di presupuesto. E topiconan cu ta riba mesa ta entre otro; geschillenregeling, cu lo sigui cu e tratamento di Rijkswet den Tweede Kamer den e prome siman di juli. Tambe lo sigui elabora riba e area di cuido di salud, hof constitucional, conexion di Fastferry, mercado interno, e gastonan di roaming, Congressional Caucus on the Kingdom of the Netherlands, Contactplan Surinam, screening di (candidato) e ministernan.
BISHITA REY WILLEM ALEXANDER
Diamars 25 di juni e delegacionnan lo haci un bishita na paleis Noordeinde, unda lo topa cu Rey Willem Alexander. Mas cu claro esaki tin su parti protocolario y e reglanan di oro cu cada miembro di comision mester tene cuenta cu ne.
REUNION IPKO
E reunionnan di IPKO ta keda uno relevante, specialmente mirando e ultimo desaroyonan politico. E topico di situacion di Venezuela sigur ta uno cu por spera intercambio di pensamento y postura entre e islanan y Hulanda. E Metanan di Desaroyo Sostenibel (SDG’s) tambe ta riba mesa, unda cada pais lo intercambia y elabora riba nan status den diferente area. E parti positivo di esaki ta, cu e parlamentarionan ta bay traha den un grupo mas chikito y ta haya oportunidad pa intercambia idea, informacion y plan, unda sigur cada parlamentario ta brinda y aporta nan experticio y conocemento cu otro.
Na final di cada encuentro di IPKO ta yega na un lista di palabracion (afsprakenlijst) y ta firma esaki y durante e aña lo monitorea e ehecucion di e palabracionnan haci di e paisnan di Reino: Hulanda, Aruba y Corsou.