ORANJESTAD – E siman aki Minister Ruiz-Maduro a reuni cu sr. Pascal Thierry Clivaz, director suplente di Universal Postal Union (UPU) cual ta e agencia intergubernamental specialisa di Nacionnan Uni cu ta percura pa coordina e maneho postal di e Paisnan miembro y tambe pa e sistema di post cu ta wordo usa na henter mundo.
Tabata un bishita ameno y hopi informativo den cual sr. Thierry Clivaz a splica riba e beneficionan cu UPU ta ofrece na su miembronan, e retonan cu ta vislumbra y e oportunidadnan cu esaki ta trece cune. Sr. Thierry Clivaz a splica cu UPU no solamente ta percura pa e sistema postal por traha eficientemente entre e Paisnan, pero tambe ta concentra riba inclucion financiero brindando acceso financiero na esnan cu dificilmente por tin acceso na servicio financiero. UPU kier yuda ‘bank the unbankable.’ Hunto cu esaki UPU ta ofrece un sistema automatisa di pago cu por wordo usa ora ta trata di e-commerce. Di e manera aki UPU kier facilita e cuidadano of e companianan chikito y mediano cu no tin acceso na sistema di pago online, manera por ehempel PayPal, cu un sistema di pago universal pa por haci uso di e-commerce. Pa Aruba unda cu 90 % di companianan ta chikito of mediano, un alternativa di pago asina sigur lo ta deseable pa asina por tene gasto di transaccion abou.
Un di e motibonan di UPU su bishita den nos region tin di haber tambe cu e noticia cu Merca lo kier retira su miembrecia for di e union postal cu ta data di aña 1874 y esaki por tin consecuencia serio pa e continuidad di e servicio postal regional ya cu por ehempel Miami ta un hub importante pa post pa nos region. Ta bin aserca cu asina cu un Pais no ta forma parti mas di e union postal, e Pais no lo por usa e sistema universal di post mas y esaki lo trece desavio sigur pa e Paisnan na mundo y sigur den nos region cu ta conta riba e conectividad aki.
Minister Ruiz-Maduro a gradici sr. Thierry Clivaz pa su bishita y e informacion importante cu a ser comparti y a brind’e un recuerdo di Aruba.