Sabana Liber, Noord: Diadomingo algo pasa di 1’or y mey di merdia, presencia di polis ta wordo pidi cu urgencia na un cas na Sabana Liber pa un homber cu a comete destruccion na autonan di su ruman muhe.
Na yegada enberdad e agentenan policial ta topa cu dos auto staciona dilanti di e cas, un Nissan March Shinishi y un Great Wall cora, ambos auto nan glasnan tabata destrui. E homber cu a destrui e glasnan di e autonan ainda tabata na e sitio y tabata tin un bate di baseball den su man, polisnan a kita esaki y mesora a bay over na detene e agressor aki.
Un dama na e cas a acerca e polisnan y a splicanan cu e autonan ta di su persona y cu e homber cu a comete e destruccion na e autonan ta su propio ruman homber. Ela sigui splica polis cu ela yega cas for di hotel pa muha e matanan na e cas y a bin topa cu su ruman homber drumi den camber cu airco cendi. E dama a reclame pakiko e tin e airco cendi y esaki no a cay den bon tera cerca e ruman homber, e ruman homber a rabia asina hopi cu ela pasa man pa un bate baseball, a bay pafo y a destrui tur e glasnan di e dos autonan.
E ruman homber aparentemente tabata bou influencia di un of otro substancia, ela wordo transporta cu transportwagen di polis pa Warda di Shaba, menos mal cu ela keda solamente na daño material y no a agredi su ruman muher fisicamente. E agentenan prome cu nan a bandona e sitio a splica e dama e camindanan cu e mester cana, mirando cu e daño material haci na su dos autonan ta hopi grandi.