Durante e encuentro diamars atardi den Parlamento cu Minister Rudy Lampe relaciona cu su maneho di Traimerdia y scolnan SPO, Parlamentario Alan Howell a expresa cu ta den un situacion caminda cu tin diferencia di opinion principalmente debi na e cambionan cu lo bin den Traimerdia y scolnan SPO.
E parlamentario a bisa cu ta importante pa scucha e vision di e minister, pero tambe ta importante pa scucha e preocupacion di e maestronan pa loke ta e cambionan cu e minister kier trece y ta den ‘pipeline’.
“Como parlamentario mi mester scucha pueblo. Mi mester scucha mayornan y mi mester salvaguardia e interes di nos alumnonan, di nos muchanan. Varios biaha nos a scucha e minister bisa cu e tin un vision y un parti di dje cu mi tin preocupacion pe ta e parti di huiswerk y no mag di desvia for di e huiswerkbegeleiding na ningun momento. Y si papia di desvia for di dje, mi ta kere Traimerdia a cay fo’i otro totalmente”, Alan Howell a indica.
E ta bisa esaki pasobra e structura di Traimerdia a wordo traha basa riba e principio cu e muchanan por sali for di scol y tin e opvang na Traimedia unda cu tin profesionalnan cu por sigui yudanan cu nan educacion y logicamente ta haya e oportunidad pa recrea tambe.
Teniendo na cuenta esaki y e deseo di maestronan, mayornan y muchanan, como parlamentario, Alan Howell a pidi e minister di Enseñansa pa pone tur cambio on hold, pa sinta den un tipo di dialogo pa trece paz y trankilidad, scuchando maestronan y pueblo pa por logra un miho structura.
Finalisando el a bisa “mi ta kere cu nos mester duna esnan den e field di enseñansa e respet pa nan profesion, scuchanan, pone tur decision di cambio pa loke ta trata structura on hold y sinta den un dialogo pa wak unda por mehora, mehora y sali hunto logrando un consenso”.