Parlamentario Endy Croes ta indigna na e manera cu e bestuur actual ta atende cu Lotto muy en especial cu Minister di deporte. Parlamento tin un derecho autentico ancra den Staatsregeling di Pais Aruba unda Parlamentarionan por haci preguntanan oficial na tur departamento of instituto di gobierno. Con esaki ta funciona? Parlamentario ta manda e preguntanan por escrito cual ta sali oficial mediante Presidente di Parlamento y ta bay na e Minister concerni cu ta encarga sea cu e departamento, instituto of compania estatal. Minister na su turno ta manda e preguntanan na esnan concerni y lo ricibi contesta por escrito unda finalmente Minister ta manda contesta bek Parlamento unda henter Parlamento tin acceso na e contestanan aki.
Como Parlamentario mi a haci un total di 23 pregunta inicialmente na Minister relaciona cu Lotto. Tur compania manera APA, ATA, Utilities, Elmar, RDA entre otro a cumpli cu nan deber di contesta e Minister concerni pa asina Parlamento haya e claridad cu nan ta busca. Lotto pa Deporte a dicidi di no ta contesta net net nada y a bisa e Minister pa e mes contesta Parlamento. Con un Minister por contesta si e no ta ricibi ningun documento? Con estupido e Bestuur di Lotto por ta? Keriendo cu tipo di weganan asina bo lo yega leu? Silvio Janga, Eli Kock, Antonio Kamperveen, Flavio Faneyte, Benvinda Da Sousa (casa di Desiree Croes ex Parlamentario) kico boso kier logra? Boso tin Lotto na werki y atletanan sufriendo. Boso a bende Lotto cu CBN unda CBN awe ta ricibi 23% di benta bruto cu ta algo inexplicabel.
Minister a manda Bestuur di Lotto como ehempel na december 2018 momento cu a trata presupuesto 2019 un total di 3 emails, respectivamente 3 di december, 4 di december y 5 di december pidiendo boso cooperacion pa contesta preguntanan di Parlamento. Contesta di Minister na Parlamento den e siman di 18 pa 20 di december ta “Het spijt mij te melden dat er geen transparantie is in het beleid van FLPD.” Pueblo por saca su mesun conclusion. Bestuur ta amigo y activistanan di AVP awe ainda den funcion. Activistanan aki no ta coopera y no ta transparente faltando tur clase di respet pa Parlamento y nan Minister. Pues ta un muestra di desconfiansa total y e directiva aki mester bay den bon of den malo.
Boso no ta sinti cu boso a abusa demasiado caba? Boso no tin berguensa di cana den pueblo? Boso no tin consenshi y ta compronde cu locual boso ta haciendo no ta bon? Boso ta compronde si cu un investigacion boso tur mester bay duna cuenta na rechtmatigheid y doelmatigheid di placanan di deporte cu boso a abusa di dje? Wel e siman aki lo bira un siman interesante. Malechornan, abusadornan estafadornan di Lotto mester entrega nan retiro. No mas!!!