Pa e comunidad Felipino na Aruba diaranson 12 di juni tawata un dia di celebracion di e di 121 aniversario Dia di Independencia di Filipina. Durante e acto protocolar na Wilhelmina Park diaranson mainta, e Consul Honorario Amy Henriquez-Mendez a habri e ceremonia gradiciendo Aruba y e comunidad Filipino pa e honor di a fungi como Consul Honorario di Filipina pa Aruba pa hopi aña. Señora Amy ta retirando y manera el a expresa, ta tempo pa un persona mas jong tuma over. Siendo un comunidad Filipino grandi den Caribe, ta necesario pa nan tin un representante consular na Aruba.
Presente na e acto protocolar tawata entre otro Gobernador di Aruba señor Alfonso Boekhoudt, Presidente di Parlamento señor Ady Thijsen, Parlamentarionan, Premier Evelyn Wever-Croes Ministernan di Gabinete Wever-Croes, Consulnan di diferente pais y demas invitadonan.
Premier di Aruba Señora Evelyn Wever-Croes a duna su discurso dirigi na e comunidad Filipino residencia na Aruba cuminsando su discurso pa gradici nan pa scoge Aruba como nan hogar nobo, formando asina un comunidad Filipino bunita. Na Aruba ya caba tin un mas di un generacion Filipino.
“Boso a yega Aruba na momento cu mas necesario y a contribui grandemente na e desaroyo economico y e prosperidad di Aruba. Pa esaki, nos lo ta semper agradeci. Boso ta ocupa posicionnan den casi tur ramo di trabou, sea ta e di mas humilde te na posicionnan ehecutivo.
Boso a prueba di ta confiabel y semper por conta cu boso como trahador. Mas ainda, boso ta ciudadanonan respetoso, ehemplar, y ta cumpli cu ley.
Premier Wever-Croes a expresa cu ta un alegria y honor pa celebra e dia nacional di Filipina hunto cu e comunidad Filipino na Aruba net manera cu nan tambe ta celebra nos dia nacional cu nos. Den nomber di Aruba y Gobierno di Aruba, Premier Evelyn Wever-Croes a extende nos mas sincero gradicimento na e comunidad Filipino pa tur nan esfuerso, sacrificio y apoyo na nos pais.
“Boso ta homber y muhenan dedica na sostene boso famia y contribui grandemente na economia di Aruba. Aruba a bira boso cas leu di cas. Laga nos celebra hunto e libertad cu asina tanto boso ta aprecia y tambe laga nos recorda awe e homber y muhenan cu a lucha pa e libertad cu awe nos ta celebra e fecha di independencia di Filipina. Hunto nos ta vence tur reto nos dilanti cu confiansa y perseverancia. Como Premier di Aruba y for di profundidad di mi curason, mi ta felicita tur Filipino den nos comunidad y rond mundo cu e di 121 aniversario di Dia di Independencia di Filipina”, Premier Wever-Croes a expresa den su discurso riba Dia di Independencia di Filipina.