Durante conferencia di prensa di Fraccion di POR, Alan Howell a bin dilanti y bisa cu Prome Minister a anuncia cu lo sondea e posiblidadnan pa haya Marina Real pa controla costanan di Aruba y cu lo busca e forma pa cera un protocol cu Marina Real pa haci esaki.
E tema aki ta uno cu Alan Howell como miembro di Fraccion di POR a bin ta boga pe pa varios luna, mirando e experticio cu nan tin riba e tereno aki. Esaki no kiermen cu Cuerpo Policial of Warda nos Costa no por, pero cada man extra ta yuda, ademas cu Marina Real ta bon ekipa y bon entrena pa haci esaki.
Howell ta keda insisti cu mester keda manda mensahe fuerte specialmente pa nos pais bisiña cu drenta nos pais no ta bay ta facil y no ta un ‘free for all’. “Nos ta convivi cu pueblo Venezolano, loke ta pasando cu nan ta hopi tristo, pero nos como pais chikito no por tuma over loke ta pasando na Venezuela”.
Alan ta di opinion cu hayando Marina Real pa yuda proteha y controla nos costanan ta un forma di manda e mensahe cla y raspa bisando cu nos no ta bay tolera coi kens. Si tuma nota di loke ta pasando internacionalmente na paisnan mas grandi, manera Trinidad & Tobago unda e Minister President a splica publicamente cu na ningun manera nan por acapara e problema cu tin na Venezuela y laga nan frontera habri pa e Venezolanonan drenta nan pais con cu nan kier, ta un indicacion cu pasonan ta wordo tuma pa evita e fluho di posibel migrantenan Venezolano na otro paisnan. Aruba como un pais di 110 mil persona no tin e luho di hunga bunita y pensa cu nos si lo ta man habri pa laga tur hende drenta akinan, esey ta imposibel.
“Mi ta contento di scucha e mensahe fuerte cu Prome Minister Evelyn Wever-Croes a manda. Fraccion di POR y mi persona sigur ta para 100% tras di e decision aki di pidi ayudo na Marina Real, esaki ta algo cu mi ta vociferando basta tempo caba. Kisas si e decision aki a wordo tuma basta dia caba, e situacion hasta lo por tabata diferente awe na Aruba”, Alan Howell a duna di conoce.
E ta agrega cu ultimo dia por a mira cu otro boto a yega tera a pesar di e tremendo trabou cu Warda Nos Costa y Coast Guard ta haciendo. E hendenan aki ta sigui purba tur manera pa drenta, nan no a drenta di parti pazuid, nan a drenta di parti panort. Es decir, e hendenan aki ta decidido y ta di compronde mirando e situacion caotico di nan pais, pero nos mester sigui proteha nos pais, nos mester keda vigila nos costa y na bienestar di e trankilidad y siguridad di nos comunidad mester sigui manda e mensahe cla y raspa cu aki no tin ganga y mucho menos ‘free for all’, parlamentario di POR a declara.