Dialuna 10 di juni, e comunidad Portugues riba nos isla a celebra dia di Portugal y dia di Luis Vas de Camoes, simbolo di patriotismo Portugues, y dia di comunidadnan portugues. Na Aruba, esaki ta e di 54 aña cu e comunidad Portugues na Aruba a cuminsa celebra e dia aki na Aruba. Atardi a tuma luga e ceremonia protocolar na Wilhelmina Park. Premier Evelyn Wever-Croes na e ocacion aki a duna un discurso na unda cu el a gradici e comunidad Portugues riba nos isla pa e contribucion cu nan a haci durante hopi aña pa desaroya nos pais.
“Un pueblo cu kier ta liber, mester di su simbolonan di libertad, y e bandera y himno di un pais, su celebracion nacional ta e prueba mas importante di un pais liber. Y ta un honor pa mi, den nomber di Gobierno di Aruba, di por celebra e fecha importante aki cu boso, mescos cu boso tambe ta celebra hunto cu nos nos dia di himno y bandera.
E comunidad Portugues na Aruba ta data desde añanan 60, y ta varios generacion cu a contribui na e comunidad multi cultural di Aruba.
Esnan cu a bin di Portugal ta conoci como hende cu ta traha duro y semper amable. Personanan cu a busca un miho futuro pa nan famia, y cu dignidad y trabou duro, a logra esaki, y mester ser bisa, sin sacrifica balornan ni su origen.
Varios di boso a laga boso hogar y boso famia, pa bin establece na Aruba, y a haci di Aruba boso hogar. Sr. Betico Croes, kende ta wordo considera e libertador di Aruba, a bisa cu Arubiano no ta solamente esun cu a nace na Aruba. Si abo a nace na otro pais, y bo a haci Aruba bo hogar, abo tambe ta Arubiano.
Riba e dia nacional di Portugal mi kier felicita tur ciudadano Portugues, especialmente esnan residencia na Aruba, y gradici boso pa yuda nos desaroya nos economia. Den e transcurso di añanan hunto nos a experiencia bon tempo y menos bon tempo na Aruba, y toch boso a keda, demostrando asina boso determinacion pa lucha pa e progreso di boso mes, y di Aruba. Danki pa kere den Aruba.
Nos pais ta enfrentando retonan enormemente grandi, retonan financiero, retonan social, retonan economico y retonan cu e crisis den Venezuela. Nos no mester tin miedo di e retonan aki, pasobra nos pais a enfrenta retonan similar den pasado. Y mescos cu den pasado, e biaha aki tambe mi tin tur confiansa cu nos lo vence e retonan contal cu nos ta uni. Uni nos lo vence e retonan y desafionan. Uni nos lo vence tur obstaculo cu lo crusa den nos caminda, y uni nos lo logra e bienestar di nos pueblonan, cu tanto nos ta anhela.
Pabien! Y cu Dios bendiciona henter e comunidad Portugues y di Aruba. Muito Obrigado! Masha Danki!”, ta palabranan cu Premier Evelyn Wever-Croes a expresa den su discurso na e celebracion di Dia di Portugal.