Gobierno a presenta un cambio di e ley di supervision financiero pa Aruba (LAFT) pa expande e periodo di supervision te cu 2021 y remplasa e normanan presupuestario vigente pa e periodo aki. E LAFT cu Gobierno actual a presenta ta e mesun LAFT cu Gobierno anterior a bin cun’e, miembro di fraccion di AVP, mr. drs. Richard Arends a declara. E cambionan a regarda e mesun ley cu a wordo aproba na 2015.
“Fraccionnan cu ta sostene e gobierno actual, a opta sinembargo pa trece un amienda cu ta cambia e ley di supervision financiero te den su esencia. A remplasa e palabranan ‘Conseho di Minister di Reino’ pa ‘Parlamento di Aruba”. Parlamentario Arends ta sigui splika cu den prome instancia ta mustra cu Parlamento ta haña mas control, pero e amienda aki ta duna Conseho di Minister di Reino hustamente mas poder compara cu loke e tabata tin bou di LAFT y segun loke Statuut ta prescribi.
“Como cu e protocol acorda pa e gabinete actual ta keda vigente, Conseho di Minister di Reino lo sigui actua sin ningun molester, pero sin un ley como base: un protocol entre gobiernonan lo determina nos orden consitucional di awor en adelante y Prome-Minister a confirma esaki,” Parlamentario Arends a splika. “Parlamento por haña su mes den un situacion cu na momento cu un presupuesto cumpli cu e normanan y Parlamento aprobe, Conseho di Minister di Reino por duna un instruccion pa mande back basa riba un protocol y no a base di un ley.” Segun e contesta ricibi di Prome-Minister, Conseho di Minister di Reino lo actua awor a base di un protocol y, segun Parlamentario Arends, e amienda ta kita awor tur base legal pa limita esaki. Supervision di nos finansa publico no ta wordo regla mas den un ley, pero segun un protocol palabra entre e dos gobiernonan.
Parlamentario Arends no ta haña e desaroyo aki deseable, “Conseho di Minister di Reino tin competencianan limita segun nos Statuut: ni mas ni menos. Discusion di e rol di Conseho di Minister di Reino riba finanzas publico di un Pais ta un discusion riba su mes, pero un ley local crea den cuadro di nos constitucion y Statuut ta brinda un base legal pa stipula e condicionan y limitacionan. Historia reciente a siña nos cu sin e base aki, consideracionan politico lo prevalece. Hecho cu e supervision tabata ancra en un ley di Aruba, a duna Gobierno y Parlamento derecho pa cambie y debati riba dje. Otro variantenan lo tabata un AmvRB of Rijkswet unda cu Parlamento ni Gobierno di Aruba tin influencia riba nan.”
Hecho cu fraccionan di coalicion a cambia e proposito y meta di un ley cu Gobierno a presenta ta duna un señal cla na Gobierno. Segun nos sistema y custumbernan constitucional cu tanto a wordo cita durante tratamento di e ley, fraccion di AVP ta haya cu gobierno mester a saca su conclusion mirando cu fraccionan di e coalicion no a sostene locual Gobierno a presenta. “Cu e amienda aproba, e ley di supervision financiero a bira simplemente ‘un’ ley riba ‘un’ supervision financiero, sin ningun efecto, pasobra Parlamento aparte di ta co-legislador, e ta bay ta awor tambe supervisor di su mes,” Parlamentario Richard Arends a declara.