Caya Frere Alexius – Diaranson marduga pa mas o menos 1’or y mey, polis y brandweer a bay cu urgencia den Caya Frere Alexius, caminda lo tin dos auto na candela dilanti di un cas y e candela lo tawata menasa e cas tambe.
Na yegada, autoridad ta topa enberdad, cu dos auto completamente na candela, mesora a lanta un sospecho cu esaki lo por a wordo cendi intencionalmente.
E candela tabata grandi y hopi feros, cu esaki a causa basta daño na e parti di dilanti di e cas.
Aparentemente lo tin sospecho ariba un homber di inicialnan M.D . pa motibo cu e homber aki lo tawata tin un relacion amoroso cu un persona cu ta biba na e cas aki y e relacion a caba, pero aparentemente e homber no kier acepta cu cos a caba. Na varios ocasion e habitante a yama polis pa e persona aki, paso su presencia ta indesea na e cas aki.
Autoridad sigur lo tin caminda amplio pa cana pa asina yega na e persona cu probablemente lo a comete e acto aki, y M.D posiblemente lo ta e sospechoso principal.
Diaranson mainta autoridad a bay bek na e adres, pa asina compila mas evidencia y tambe informacion. E caso ta den man di autoridad y spera cu pronto lo por pone man riba e persona cu a comete e acto baho aki.