Aruba completo por mira e exito di participacion di Prome Minister Evelyn Wever-Croes den e e-Governance Conference 2019 na Estonia. Prome Minister na momento di a acepta e invitacion pa participa na e conferencia aki como un orador y panelista, el a sigura pa tin varios reunionnan riba su agenda durante su estadia corto na Estonia. Di e manera aki, Premier di Aruba ta probecha cada biahe cu e haci pa trece resultadonan grandi bek pa nos pais.
E ultimo compromiso oficial na Estonia di Prome Minister, el a reuni cu ‘Minister of Foreign Trade and Information Technology’, señora Kert Kingo. Premier di Aruba a comparti e vision di Gobierno di Aruba riba difersificacion economico: creacion di un Sociedad di ciencia y tecnologia basa riba conocemento y economia lo ta e herment pa garantisa innovacion na Aruba y garantisa tambe e competividad di Aruba su economia y e internacionalisacion di negoshi. Pa e motibo aki, ‘Knowlegde Economy’ ta un di e Sectornan Prometedor di Aruba y nos ta habri pa oportunidadnan comercial den e tereno aki. Sea ta conocemento, servicionan of educacion, den e ultimo caso aki, programanan di intercambio estudiantil manera nos facultad di SISSTEM.
Vision di Aruba no por wordo logra riba nos mes. Pero nos ta dal stapnan grandi pa logra y pa logra, nos mester uza conocemento y experticio di otro paisnan manera Estonia cu tawata exitoso den e implementacion di un sistema di e-Governance.
Ambos Prome Minister como e mandatario di Estonia a expresa nan deseo pa explora colaboracionnan nobo entre e dos paisnan. Pa Gobierno di Aruba, e meta semper ta pa pone e ser humano central. Y pa esaki ta importante pa logra un plataforma di e-Governance fuerte. Como un pais chikito den region, Aruba ta determina pa logra esaki pa sigura miho servicio na tur ciudadano y mas ainda, trece transparencia den e aparato gubernamental.