ORANJESTAD – Dialuna atardi na Village Plaza San Nicolas Minister di Turismo sr. Dangui Oduber hunto cu CEO di ATA sra. Ronella Tjin Asjoe-Croes y dirigentenan di Island Fest Foundation a tene un conferencia di prensa pa duna pueblo mas informacion tocante di Island Fest. Island Fest lo tene su prome edicion dia 29 di mei binidero na San Nicolas.
Island Fest ta bay ta un evento cu un concepto ful diferente, esaki ta debi cu lo bay tin un show historico impactante nunca antes bisto, tambe ta bay tin 2 banda musical. E cayanan di San Nicolas lo wordo transforma cu iluminacion y cu hopi entretenimento. Island Fest lo bay tuma lugar entre e 3 cayanan riba e rotonde cu e strea. Cada caya lo bira un Island y lo tin su mesun tema, entretenimento,show, bar y cushina.
Pa sostene e maneho di Turismo unda ta trece turistanan di calidad, a crea Island Fest. Island Fest lo organisa den aña 2019, 1 evento pa luna den e districto di San Nicolas. Otro aña lo tin 2 evento pa luna lo añadi e districtonan di Noord, Santa Cruz y Playa. E festival aki lo duna e turista e balor pa su placa. A scohe e fecha di 29 di mei pa e prome edicion, esaki debi cu ta high season y ta den e siman di Soul Beach Music Festival.
Minister Dangui Oduber ta invita Aruba completo pa sostene e evento di Island Fest na San Nicolas, lo bay tin un variedad grandi di cuminda. Esaki ta un momento familiar caminda tur otro districto di Aruba por bini hunto e anochi ey den San Nicolas. Manera ta ser bisa Aruba meets in San Nicolas dia 29 di mei.