Diaberne awor dia 17 di mei lo tuma lugar e ciere di e serie di college titula: Caraïbische dromen; De literatuur van Suriname en de voormalige Nederlandse Antillen di Prof. M. van Kempen. E ultimo college di M. van Kempen lo ta dedica na e novela De terugkeer van Ricardo Bonifacio di autor Chesley Rach.
Riba invitacion di Prof. van Kempen, autor/essayista Quito Nicolaas lo hiba palabra den e di dos parti di e college. E lo trata e tema di Literatura Arubiano y den e cuadra aki a solicita pa e autor elabora riba su propio obranan. Den su charla e lo trata e diferente aspectonan di e clima literario y e estorbonan cu mester a surpasa durante añanan. No solamente cu den pasado a omiti di stimula un cultura di lesa, sino e poco interes academico pa conduci estudionan na Aruba. Den esaki e lo haci referencia na e instituto Arubiana/Caribiana di Biblioteca Nacional di Aruba, unda awendia por haci uzo di nan coleccion digital pa haci cierto investigacion. Alabes e lo duna atencion na e papel importante, esta formacion di identidad y personalidad di hobennan, cu literatura Arubiano por nifica na scolnan.
Despues di 1986 a bin cierto cambionan, aunke te ainda mayoria di nos autornan ta enfoca riba e mercado di buki pa mucha y poesia. E genero di poesia a keda domina e otro generonan manera por ehempel di prosa, no-ficcion, teatro. E cambionan por ser atribui na e echo cu den añanan ’80 a traha na e infrastructura literario, pero esaki no a resulta den un aumento significativo di e produccion literario. Ultimo añanan por ripara un interes creciente pa scirbi buki cu ta trata nos historia y ta algo cu mester sigui stimula. Historia di un pais, sea den forma di un novela, teatro of obra no-ficcion, mester haya mas acogida y ricibi un lugar prominente.
E charla di sr. Nicolaas lo tuma luga na PC Hoofthuis, Spuistraat 134, Amsterdam, den local 434. E orario ta di: 11.00-14.00 pm. Entrada ta gratis y tur hende ta bon bini.