Cura Cabay – Diabierna anochi polis y ambulance a ser manda cu urgencia dilanti ex cas di Ho Sing Loy, pa un accidente di auto serio.
Informacionnan na prome instante a papia cu lo tin 3 auto envolvi. Berdad tawata tin 3 auto envolvi, solamente cu 1 di nan un Hyundai Accent tawata staciona dilanti e cas.
Loke a pasa
Segun testigonan, e pick up tawata bayendo direccion San Nicolas cu velocidad halto, y parse cu un poco mas pabou den area di Cura Cabay Store elo a dal of hera dal un auto.
Di e manera eynana ela sigui pasa auto, y ta topa cu e Hyundai Accent bayendo direccion Savaneta.
Esaki a causa un impacto duro ora nan a dal frontal. Durante cu e autonan a zwaai e Hyundai Accent a bay dal un otro Hyundai Accent staciona dilanti e ex cas di Ho Sing Loy.
Materiaalwagen di Brandweer mester a sali di post Sabana Berde direccion Cura Cabay, pa libera e chauffeur cu a keda pega.
Bomberonan a traha basta lihe y a sa di saca e chauffeur den un tempo cortico.
Mientrastanto polisnan a detene e chauffer di e pick up, sospecha di tawata coriendo auto bou influencia. Ela wordo poni den boei y prome cu nan a hibe warda di polis pa test a laga Paramediconan controle, debi cu tawata trata di un impacto duro.
Na warda elo mester bay pasa test ariba e machine grandi, y asina polis lo haya sa cuanto alcohol ela bebe.
Chauffeur di e Accent a wordo saca di e auto y poni den Ambulance, unda nan a sali despues cune pa Hospital.