Un otro tema importante cu a wordo trata durante e reunion anual Koninkrijksoverleg Buitenlandse Betrekkingen (KOBB) cu a tuma luga dialuna na Sint Maarten, ta e tema di Visa pa Venezuela. Aruba desde algun tempo caba a haci un peticion pa asina introduci un exigencia di visa pa e Venezolanonan. Visa ta un asunto cu ta regarda Reino y solamente si tin consensus riba nivel di Reino, esaki por wordo ehecuta. Prome Minister Evelyn Wever-Croes a indica cu desde cu Gobierno di Aruba a cuminsa trata e topico aki cu Hulanda, Hulanda a mustra hopi entusiasmo. Corsou tambe tin un bista riba e tema di visa.
Gobierno di Aruba, mirando e situacion actual di nos pais bisiña, mester ta mas eficiente y crea mas condicionnan pa permiso di entrada pa Venezolanonan. E fluho di Venezolanonan pa Aruba ta creciendo cada dia mas y ta causa aumeno di presion riba diferente area na Aruba entre otro riba e parti di siguridad, bienestar, y asilo y migracion. Gobierno ainda no a haya apoyo suficiente den Reino pa implementacion di visa, sinembargo ta trahando riba dje. Como cu e proceso di esaki tin su tardansa, a dicidi cu lo introduci un otro exigencia of rekisito pa entrada na Aruba, cu ta similar na e ESTA. ESTA ta un permiso pa drenta Merca cu por wordo pidi na Gobierno Mericano prome cu biaha pa Merca. Y e introduccion di e tipo di permiso aki ta algo cu ta na benificio di Aruba. Ya caba Gobierno ta trahando riba e parti legislativo y tecnico di esaki y ta evalua pa implementa esaki den fase. Pa esaki Aruba no tin mester di cooperacion di Reino. Aruba por introduci esaki mientras ta trahando riba e peticion di e plan di visa pa esnan cu ta bin di Venezuela pa Aruba.
Cu e introduccion di e tipo di permiso aki, Gobierno por obtene mas informacion di esnan cu kier drenta Aruba y por haci un screening mas adecua. Te awo, hopi persona ta drenta nos pais como turista, y na e momento di nan yegada no por haci e screening adecua pero e necesidad tey pa haci esaki tey.
“Ainda nos no a logra riba e nivel di Reino pa introduci un visa pero lo sigui trata e tema aki. Pero si nos lo introduci di nos mes un permiso manera ESTA como exigencia. Esaki ta conta tambe pa esnan cu ta biaha di Venezuela pa Aruba, prome cu nan biaha nan mester aplica pa e permiso aki. Di e manera aki, Aruba por haya un miho bista di esnan cu kier bin y ki tempo nan kier bin. Esaki lo yuda Aruba tambe den e control di frontera y ta na beneficio di mas siguridad na Aruba”, Prome Minister a duna di conoce.
E Prome Mandatarionan di Aruba, Sra. Evelyn Wever-Croes, di Sint Maarten, Sra. Leona Marlin-Romeo y di Corsou, Sr. Eugene Rhuggenaath y Minister di Relacion Exterior di Hulanda, Stef Blok tawata presente na e reunion anual Koninkrijksoverleg Buitenlandse Betrekkingen (KOBB) na Sint Maarten.