Aruba, den e ultimo dianan, a wordo informa di diferente caso di abuso di menor cu un biaha mas a causa hopi reaccion den nos comunidad. Pa cua motibo tambe, Gabinete Wever-Croes, representa pa Minister di Asuntonan Social, Minister di Salubridad, Minister di Husticia, Minister di Enseñansa y Prome Minister, a duna declaracionnan amplio riba tur locual e Ministernan encarga cu e tema aki y Gobierno en general a haci y ta haciendo riba e problematica aki cu ta afecta nos pueblo en especial nos muchanan.
Na e momento cu Gabinete Wever-Croes a cuminsa goberna, mesora a nota un negligencia grandi riba e veld social pa cua motibo tambe mesora a cuminsa traha riba e Social Crisis Plan. E plan aki ta traha riba e crisis social mientras tambe Gobierno ta trahando riba e prevencion di e tipo di abusonan aki.
Ora cu ta papia riba abuso sexual sea ta di mayor of di menor, mester tambe considera henter e trayectoria. E trayectoria ta cuminsa cu conscientisacion y prevencion. Gobierno ta trahando riba esakinan y ta duna ful atencion pa asina pronto tur cos por ta in place. Despues ta sigui e parti di con pa atende cu e victima y su famia y con pa adresa e problema na e mes momento. Despues ta sigui e parti di investigacion y di castigonan cu mester wordo imponi pa e abusadornan.
“E problematica aki no ta facil sino mas bien hopi delicado. Sinemargo nos mester para keto na un punto hopi crucial. Esaki ta prioridad number un desde di inicio di gobernacion di Gabinete Wever-Croes y ta keda e prioridad number un tur dia pa percura pa nos muchanan wordo protehi. Pasobra nos muchanan ta mira riba adultonan pa protehe nan pa cua motibo Gobierno ta pone esaki como prioridad hopi halto riba agenda den gobernacion”, Prome Minster a enfatisa.
For di cifranan cu a ricibi, 90% di casonan na unda muchanan ta wordo abusa sexualmente, ta wordo abusa door di personanan cu e victima conoce. E por ta un amigo di cas, of amiga of amigo di mama y tata, pareha nobo, door di omo, door di welo, of padrastro. Esakinan ta personanan cu ta cerca di e muchanan y kendenan e muchanan ta confia. Personanan kendenan a mayornan a confia pa laga nan yiunan den nan cuido.
Prome Minister Evelyn Wever-Croes: “Pa nos combati e fenomeno aki cu ta un crueldad enorme contra un mucha, nos tur mester haci’e. Nos por cuminsa pa evita e 90% di e casonan aki door di wak miho cu kende nos ta laga nos yiunan y reconoce señalnan den e mucha of den esnan cu ta wak pa e mucha. Cada mayor mester sa kico mester haci pa protehe nos yiunan. E 10%, lag’e den man di Gobierno”.
Prome Minister a duna di conoce cu e Ministernan concerni ta cambiando e leynan y proceduranan cu mester bin pa percura pa castigonan hopi mas severo sea cu a ricibi keho of no. Lo cambia e ley pa asina profesionalnan y docternan no wordo persigui si nan entrega keho.
“Abuso sexual di menor ta dal nos tur hopi duro den nos curason. E tema y maneho tin un prioridad hopi halto riba agenda di Gabinete Wever-Croes y nos lo no laga nada desvia nos for di nos meta pa bringa e crimen aki contra nos muchanan. Ora cu nos ta bisa cu nos ta pone e ser humano central, cada mucha tambe ta central”, Prome Minister a enfatisa.