ORANJESTAD – Diahuebs atardi a tuma lugar un logro historico caminda Minister di Deporte sr. Dangui Oduber y colega Minister di Infrastructura sr. Otmar Oduber a firma un MOU cu representantenan di dragrace, motorcross, drifting y go karting pa cuminsa e proceso pa bai funda e federacion di motosport cu lo mester tuma encargo di Palo Marga.
E reunion aki a bay den hopi bon esfera unda e actornan den motorsport a haya e oportunidad pa duna nan input un biaha mas encuanto e acuerdo firma. Tabata tin entre otro lidernan di drag race, motorcross, drifting y go karting. A keda acorda cu e federacion lo consisti di 7 representante, nan lo tin e mandato pa organisa eventonan teniendo na cuenta tur reglanan stipula y lo tin e deber pa mantene e pista tambe.
E bon noticia ta cu caredanan por cuminsa wordo organisa. Cu e logro aki nos ta cuminsa e proceso pa na un manera structura, organisa caredanan bek na Palo Marga segun Minister Dangui Oduber. Minister Oduber sigur kier a gradici tur e representantenan di cada disciplina di motorsport pa nan participacion y tambe e gana pa yuda den e proceso pa yega na e federacion. Motorsport ta un deporte grandi cu hopi fanatico y e gobierno aki lo duna e deporte aki e atencion cu e merece.