ORANJESTAD – Cu hopi cautela y cu respet pa esnan afecta y nan famia, Parlamentario Daphne Lejuez ta desea di comparti su punto di bista riba e fenomeno di entre otro violencia domestico y abuso sexual di menor, cu ta aparenta di ta aumentando dia pa dia riba nos isla, y na unda – segun e parlamentario ta expresa – como comunidad ta sinti cu husticia adecuado pa e crimennan cometi no ta wordo sirbi.
Solucion realistico y husto
“Como Parlamentario, ciudadano, hende muher y sigur como mama mi kier enfatisa cu por conta cu lo mi sostene cualkier iniciativa of esfuerso cu realmente lo por hiba na percura cu un agresor/predador comproba por ricibi un castigo cu ta cuadra cu e crimen cometi, muy particularmente ora ta trata caso di violencia domestico of abuso sexual di mucha,” parlamentario Lejuez ta comenta. E ta sigui bisa cu tambe mester percura pa e cuido necesario pa e victima y su famia y traha riba un trayecto di rehabilitacion pa e agresor pa evita cu e ripiti. Of den caso cu e no por wordo rehabilita, pa ofrece un solucion na unda cu e no por ta un menasa mas pa comunidad pa di e forma aki kibra e ciclo di abuso.
Mester mas cu solamente ley
E parlamentario ta sigui elabora cu: ‘Lo mi desea di aclaria, cu mientras ley en berdad por ta un herment pa logra esaki, e lo ta efectivo solamente si e procesonan cu por hiba na un condena husto of maximo, den caso di violencia domestico of abuso contra menor, ta “in place” y funcionando debidamente.’ Pasobra sin esaki, segun e parlamentario ta sigui elabora, cualkier iniciativa di ley cu ofrece aumento di castigo lo no duna e resultado cu nos tur kier wak, cu ta pa tin husticia pa e victima, of sobreviviente di un experiencia traumatico asina. Aki varios departamento manera Husticia, Hospital, Wit Gele Kruis, Departamento Social y di Enseñansa mester traha hunto, mester tin personal profesionalisa y specialisa den e materia, pero tambe procesonan cu ta cumpli cu e normanan necesario pa Huez por duna un sentencia mas husto. “Pasobra sin esakinan nos lo no wak cambio den sentencia, ni cu aumenta e castigo.”
Otro factornan importante pa tene cuenta
Mas cu claro, raporta/meld e caso ta un di e prome pasonan, y aki sigur mester defini y comparti e puntonan unda y con por haci esaki, pero tambe duna e autoridad na profesionalnan y instancianan cu ta cerca y tin contacto cu posibel victima y por constata abuso, pa por tin e derecho y obligacion di raporta/meld den caso cu wak algo fuera di lo normal. Tur esakinan ta pasonan y trayectonan cu ta forma parti di e SCP (Sociaal Crisis Plan) cu e aña aki a ranca sali y cu ta inclui ministerio di Asuntonan Social como trekker, den colaboracion cu otro ministerionan, cu ta trahando duro pa crea un bida mas digno y husto pa esnan mas vulnerabel y cu mester sosten den nos comunidad.
Aki por pensa na entre otro crea un Meldpunt, Meldcode, y introduci un Vetrouwensarts dedica pa haci test y raporta caso di abuso na un forma confidencial, pero tambe e profesionalnan necesario den por ehempel departamento di Husticia pa verifica y compila prueba den casonan di abuso pa por pidi y logra castigonan adecua y husto, segun parlamentario Lejuez ta splica.
Importancia di prevencion
Parlamentario Lejuez: “Prevencion mester hopi, si no ta mas, atencion cu sancion, ya cu ora ta papia di castigo, ya e daño a wordo haci”. E parlamentario ta enfatia cu pa por logra prevencion efectivamente ta rekeri participacion di henter comunidad, unda cu si ta constata algo fuera di lo normal, ta bisa algo – “see something, say something.” Bibando den un comunidad chikito ta haci esaki dificil, pero ta hustamente por medio di keda papia riba e tema y pone contra luz di dia, nos por logra scapa esnan mas vulnerabel prome cu nan bira victima of pasa den un experiencia traumatico cu por afectanan pa bida largo.
Con abo por yuda?
“Ta importante pa nos siña cua ta e señalnan, pa asina nos tur por ta alerta y hunto contribui pa reduci e cantidad di victimanan di violencia domestico of abuso di menor. E agresor mayoria biaha ta un persona cu e victima conoce y cu tin acceso facil na dje y ta den nos circulo familiar of hopi cercano,” e parlamentario ta subraya. E parlamentario ta bisa cu nos tur ta sinti rabia, disgusto, dolor y un sentimento di impotencia cada bes cu nos wordo confronta cu otro caso di abuso. Pero nos cada un por yuda – “It takes a village” – paso ta nos tur hunto so por caba cu e fenomeno aki y proteha esnan mas vulnerabel den nos comunidad por medio di haci nos parti, y raporta asina cu nos tin un sospecho of ta wak algo straño, y di e forma aki por logra na scapa un posibel victima. Parlamentario Lejuez ta conclui cu: “silencio y berguensa ta duna mas forsa na e abusador y ta crea mas victima – kibra e ciclo di abuso – si bo wak algo, bisa algo, mester kibra silencio!”
Na Aruba tin diferente fundacion unda cu por acudi, of te hasta online por busca mas informacion manera:
• Bureau Sostenemi: 588-1010 (por yama y keda anonimo)
• Fundacion Respetami: 582-4433
• Fundacion pa Hende Muhe den Dificultad: 583-5400
• Telefon pa Hubentud: 131 (por yama y keda anonimo)
Pa mas informacion semper por tuma contacto cu Departamento di Asuntonan Social: 528-1100