Diasabra 27 di april, Alan Howell den su calidad di Vice Presidente di Parlamento, tabatin e honor pa felicita nos Rey su Mahestad Willem Alexander den nomber di Parlamento di Aruba y henter nos pueblo.
Den su discurso Howell a menciona cu ya caba pa 6 aña su Mahestad Willem Alexander ta e soerano di Reino Hulandes, despues di abdicacion di su Mahestad Reina Beatrix.
“Awe riba fecha natal di su Mahestad Rey Willem Alexander nos ta celebra no solamente su cumpleaños, nos ta celebra e echo cu e ta un ser humano ehemplar, un persona cu ta demostra e amor, solidaridad, convivencia y deseo pa yuda na tur momento.
E cualidadnan humano aki ademas di su inteligencia ta haci di su Mahestad Rey Willem Alexander un persona admira rond mundo.
Pa nos ta un honor di por yame nos Monarca, y nos ta sinti nos mes orguyoso y alabes honra di mira y sinti e atencion y interes cu e tin pa nos pais riba tur nivel.
Algo cu semper a cautiva mi persona y mayoria di nos poblacion ta e manera con nos Rey ta trata nos comunidad, prome cu Principe y despues como Rey. Semper cu un amablidad inigualabel, un sonrisa riba su cara y sin distincion algun.
E echo aki ta uno cu mi por a experencia personalmente durante bishitanan di famia real na nos isla. Como miembro di e seccion VIP di nos Cuerpo Policial, mi tabatin e honor y placer di por a traha y conoce miembronan di e famia real, incluyendo Su Mahestad Rey Willem Alexander, mas di cerca.
Durante su 6 aña di Reinado, su Mahestad a sa di demostra di ta un defensor di e participacion y contribucion activo di tur ciudadano den un sociedad democratico unda cu e respet pa otro, libertad y igualdad ta e gran vencedornan.
Como un persona cu un amor grandi pa deporte mi no por keda sin menciona e gran sosten di su Mahestad Rey Willem Alexander na tur nivel deportivo, inclusive e tabata miembro di e Comite Olimpico Internacional y te dia di awe e ta sigui cu un interes grandi pa deporte”, tabata palabranan di Alan Howel durante su discurso.
Vice Presidente di Parlamento tambe a gradici y felicita tur instancia cu a participa durante e acto protocolario di Dia di Rey, haciendo di esaki uno sublime.
Finalisando, Alan Howell a manda tambe un pabien na e ganador di e Copa Gobernador Felipe B. Tromp, e hoben Ronan van Putten cu ta destancando riba tereno social.