Recientemente, Universidad di Aruba a organisa un charla riba e tema “Government Criminality and State Undermining. E charla tawata dirigi riba e area di integridad cu debatenan y ponencianan interesante y importante den e trayectoria pa integridad. Gabinete Wever-Croes ta cuminsando cu e trayectoria di integridad poniendo ya caba diferente bloki pa e construccion di integridad den Gobierno y cada ayudo di sector academico, sector priva y sector publico lo wordo tuma den consideracion. Prome Minister Evelyn Wever-Croes ta enfatisa e importancia di tin un fundeshi firme di Integridad den gobernacion.
Gobierno di Aruba ta trahando riba diferente fase pa pone e fundeshi firme pa Integridad na Aruba entre otro Bureau Integriteit, Integriteits Kamer, Corporate Governance Code pa companianan estatal, Oficina di Obudsman, Ley di Financiamento di Partidonan Politico, Ley di Screening di intergridad di minister y parlamentarionan, KlokkenluidersRegeling pa esnan cu ta denuncia corupcion.
E prome fase ta e Bureau Integriteit, Oficina di Integridad ta ful avansa. Awoki ta den proceso pa yega na un hefe di e departamento y empleadonan cu lo bay traha den e departamento aki. Esakinan ta esnan cu ya ta trahando den gobierno y ta desea un overplaatsing. E hefe di e departamento por ta un persona cualifica sea paden of pafo di gobierno pa guia e bureau aki. Oficina di Integridad su meta ta pa aumenta conscientisacion den empleadonan publico, duna charla y training pa splica kico por y kico no por. Oficina di Integridad lo ricibi y procesa yamada y kehonan di esnan cu ta raporta kiebro di integridad sea den sector publico of sector priva. Cada yamada y keho di kiebro di Integridad lo wordo investiga pa asina garantisa Integridad den e aparato gubernamental.
E di dos fase ta Integriteits Kamer, Camara di Integridad. E oficina aki lo scrutina desicionnan grandi di Gobierno especialmente den destahonan publico. E oficina aki ta inclui den e presupuesto di otro aña y e lo bira operacional tambe pa otro aña.
Corporate Governance Code ta un organo cu lo percura pa tur companianan estatal y intitutonan semi publico tin e mesun reglanan di integridad y lo controla si nan ta cumpli cu tur regla. Nan lo duna Gobierno conseho sea cu Gobierno ta pidi of no. E organo aki ta den proceso di wordo organisa y tambe lo ta operacional pa otro aña.
Oficina di Ombudsman. Ombudsman ta e defenson di pueblo. Den Reino, Aruba ta e unico pais cu ainda no tin Ombudsman y esaki ta den proceso pa wordo realisa y bira operacional e aña aki caba. E ley ta na caminda pa Parlamento caba despues di a wordo revisa y adapta. Ya caba tin un ‘kwartiermaker’ pa organisa e oficina aki cu ta proyecta pa cuminsa funciona na principio di otro aña pero lo haci esfuerso pa e cuminsa opera na final di e aña aki mes.
Ley di Financiamento di Partidonan Politico lo percura pa tur donacionnan na partidonan politico wordo registra cu por wordo controla despues. Pronto e ley aki lo wordo trata den Parlamento bou iniciativa di Parlamentario Edgard Vrolijk. Otro aña e ley aki lo keda cla y pa e siguiente eleccion lo e ta na vigor tambe.
Ley di Screening di intergridad di minister y parlamentarionan tambe ta bou encargo di Parlamentario Edgard Vrolijk y actualmente ta wordo revisa pa Directie Wetgeving y ta trahando riba ultimo cambionan pa asina pronto tambe lo worde trata den Parlamento hunto cu e “KlokkenluidersRegeling”.
Cu e KlokkenluidersRegeling, ta garantisa e empleado cu mira corupcion pasa, por denuncia esaki sin cu e ta wordo persigui y perde su trabou.
“Esakinan ta e blokinan pa construi e edificio di Integridad den Gobierno. Ainda nos no ta caminda nos mester ta, pero nos ta hopi bon riba e caminda. Entre e aña aki y otro aña, mayoria di e proyectonan aki mester ta completa y cu placa riba presupuesto. Gobierno lo logra e meta di trece integridad, transparencia y bon gobernacion den gobernacion”, Prome Minister Evelyn Wever-Croes e duna di conoce.