Si tin un partido politico na Aruba cu den nan historia a yega di comete asina tanto engaño electoral (kiezersbedrog), esey ta partido AVP lidera pa e dinastia Emannan. Un di e prome engañonan electoral ta e traicion cu nan a comete dia 13 di oktober 1949 caminda den Staten di Antiyas nan a vota pa e Interimregeling di 12-8 y esaki despues cu den e eleccion di 1948 nan a core campaña primintiendo pueblo Separacion, pero despues a traiciona e 2147 personanan cu a firma un peticion pa mas autonomia pa Aruba (‘Baas den nos mes cas’). Cu e traicion na 1949 nan a claba tur e firmantenan aki un puñal den lomba cu e famoso 12-8. Si esaki no ta kiezersbedrog, ta con otro lo mester yama esaki anto?
Elimina Impuesto di solidaridad
Un di e otro engañonan electoral tabata esun durante e campaña pa e eleccion 1985 caminda e lider di e tempo ey Henny Eman a priminti pueblo cu asina su partido AVP drenta gobierno nan lo elimina e impuesto di solidaridad di 8.2% cu tabatin un duracion di 2 aña y tambe lo debolbe e 7 3/4% na e empleadonan publico. Para na un pomp di gasolin e manipulador aki a priminti cu e lo percura pa baha e prijs di gasolin y cu e doñonan di botonan di pisca lo haya gasolin gratis. Pero kico nos por a mira e tempo aya? Henny Eman no a cumpli cu ningun di e promesanan menciona, alcontrario su gobierno a cobra e impuesto di solidaridad durante 2 aña largo y despues a percura pa introduci un impuesto nobo di 4.1% riba lomba di pueblo. Y riba dje el a probecha di e 100 miyon florin di ayudo presupuestario di Hulanda y cual suma e Bestuurscollege di MEP a percura pa esaki como parti di solucion di e ceramento di refineria Lago na 1985.
BBO y prijs di awa/coriente
Un otro periodo di engaño electoral feroz tabata durante e eleccion di 2009 caminda Mike Eman a sclama den tur skina di Aruba cu asina e drenta gobierno (‘from day one’) e lo percura pa elimina e BBO di 3%. Pero kico nos por a mira? Na final di su gobernacion di engaño y malicia e BBO/BAZV a keda na 3.5%. Y asina aki tambe su gobierno a probecha di un suma total di 945.7 miyon florin, pues casi 1 biyon florin ricibi na BBO den e periodo 2010-2017. Un suma astronomico cu su gobierno a fiesta cune durante e 8 añanan aki.
Tambe el a priminti pueblo cu den e promer aña di nan gobernacion nan lo reduci e tarifa di awa y coriente cu 25.5% y den e siguiente aña un otro reduccion di 25.5%. Pues un total di 51% na reduccion. Sinembargo den forma traicionero y sin escrupulo Gabinete Eman dia 1 di oktober 2014 a claba un puñal den lomba di pueblo aumentando e prijs di coriente cu 15%.
Valero y aumento edad di pensioen
Den e mesun eleccion aki di 2009 el a priminti pueblo cu nan lo tene e refineria Valero habri, pero despues nan mes a regala e multinational 76 miyon florin di BBO riba export.Y al final bao di su gobernacion e refineria a cera toch na november 2012.
Te hasta e pober muchanan di scol a sufri bao di engaño di Mike Eman y AVP ya cu durante campaña nan priminti tur mucha di school basico cu nan lo haya un laptop gratis y e studiantenan di Colegio Arubano lo haya nan Boekenfonds na prijs reduci, pero un biaha mas e no a cumpli cu ningun di e promesanan falso aki.
Tambe den e programa 2009-2013 di partido AVP nan a priminti cu lo “Fiha e edad di pensioen pa tur hende na 60 aña” y den nan programa 2013-2017 nan a reafirma cu “AVP lo concentra pa mantene e edad di pensioen na 60 aña”. Pero kico nos por a mira? Ni 2 aña despues di e eleccion 2013 nan a dicidi di aumenta e edad pa bay pensioen na 65 aña y de paso e abusador a kita e Gelijk Bedrag y Bashi Premie di e pensionadonan.
Pues esakinan ta solamente un parti chikito di tur e engañonan electoral cu e 2 rumannan abusador Henny y Mike Eman di AVP a yega di comete contra nos pueblo y awe Mike cu su cara laba ta grita kiezersbedrog, siendo kiezersbedrog ta core den su propio venanan door di menosprecia y traiciona su 7822 votadornan nengando su asiento den Parlamento.
En berdad, ora lama seca, berguensa ta pa Dios!