ORANJETAD – Diabierna ultimo un grupo grandi di Aduanero a ricibi nan Decreto Gubernamental den cual nan promocion a keda oficialisa. Minister Xiomara Ruiz-Maduro tabata presente na e ceremonia y a hiba un discurso den cual a felicita tur Aduanero pa nan logro individual, cu na su turno ta un logro pa e Cuerpo di Aduana y tambe pa nos Pais. E esfuerso cu cada un ta haci pa inverti den nan conocemento ta suma na un esfuerso colectivo cu ta yuda Cuerpo di Aduana pa por progresa y brinda un bon servicio na comunidad y esaki ta beneficia nos Pais Aruba grandemente. Cu cada promocion, e Aduanero tin un responsabilidad mas grandi pa cumpli cune na beneficio di Cuerpo di Aduana y Pais Aruba. E tabata bunita pa presencia e ceremonia di e cambio di “rangonderscheidingsteken“, epaulet y insinia y e bistimento di bachi di e Aduaneronan tuma lugar door di e director y nan respectivo hefe di departamento. E ceremonia ta refleha e respet cu nos mester brinda na e cuerpo uniforma aki, pero alabes ta corda cada Aduanero riba e responsabilidad cu cada un tin pa demostra respet na e trabao uniforma y na Pais Aruba. Pabien na tur Aduanero cu a ricibi nan promocion y hopi exito den boso pocicion di trabao nobo, ta deseo di Minister Xiomara Ruiz-Maduro.