“Ta hopi importante pa nos muchanan muhe bira lider pasobra nos no por laga tur posicion di liderasgo pa hende homber so”
Arubaanse Padvindsters Gilde (APG), diasabra mainta, a organisa un “Thinking Day”. Den e cuadro aki Prome Minister Evelyn Wever-Croes a wordo invita pa bishita nan na YMCA San Nicolas. Tawata un mainta, segun Prome Minister a expresa, sumamente interesante na unda e lidernan di APG a duna un splicacion hopi amplio kico tur nan ta haciendo pa asina engrandece nan miembrecia y crece liderasgo den APG rond Aruba, cumpliendo asina tambe cu nan base di miembrecia internacional cu WAGGGS (World Association of Girl Guides and Girl Scouts).
E meta principal di APG, manera nan a indica den e “Thinking Day”, ta pa desaroya liderasgo y aporta na un futuro duradero di e ser femenino den nos comunidad.
Prome Minister a combersa cu e grupo di mucha muhe di 12-16 aña tocante liderasgo personal na unda el a menciona 3 punto importante: 1. Tur mucha muhe por mes (of mas) hopi cu mucha homber. 2. Cuida bo mes y yuda bo mes bay padilanti. Studia y prepara bo mes. 3. Step up. Asumi posicion di liderasgo sin miedo. Esakinan tawata guia pa e como Lider di nos pais, logra yega asina leu.
“Mi a puntra nan si nan kier bira Minister President. Mayoria di nan a bisa “no”. Ora mi a puntra nan dicon no, nan a contesta pasobra e ta hopi ‘stressful’, hopi trabou, no tin tempo liber ni pa famia, y ta haya hopi critica”.
Prome Minister, riba e contesta aki di e muchanan muhe, a splica nan con e ta maneha e preocupacionnan aki cu ta biba den nan y cu lo por stroba nan pa futuro pa asumi puestonan di liderasgo. Prome Minister a acentua cu si e por a kibra e bareranan aki y pone e balansa adecua pa maneha e stress, parti e trabou, maneha su tempo pa asina e tambe por gosa oranan liber pa e mes y pa su famia, y tambe con e ta maneha cada critica y no laga esakinan strobe, nan tambe por.
Prome Minister ta sinti satisfecho di por a laga atras e palabranan di encurashamento enfatisando cu ta hopi importante pa nan cada un bira lider pasobra nos no por laga tur posicion di liderasgo pa hende homber so.
“Danki na e hende muhenan cu a habri caminda pa mi mi ta spera di habri hopi caminda pa tur mucha y hende muhe na Aruba”, Prome Minister a expresa.