Marisol Lopez-Tromp a manda un carta pa Minister Dangui Oduber den cual el a haci un serie di pregunta tocante e estudio haci door di TNO na Hospital. E ta pidi e mandatario pa por fabor den e menor termino posibel contesta esakinan por escrito.
Basta luna pasa por a tuma nota di e diferente walk outs na Hospital, entre otro pa tuberianan cu a kibra, awa cu ta lek y particularmente holo (specialmente di diesel) cu lo ta plamando den diferente area di hospital.
Mirando cu Minister Oduber a bisa den Parlamento cu el lo bay laga investiga un ke otro, lider di Fraccion di POR tin entendi cu el a laga haci e investigacion aki door di TNO y a base di esaki el a manda e siguiente preguntanan pa e mandatario.
El a realisa e preguntanan aki no solamente como lider di Fraccion di POR, pero tambe como Presidente di e Comision di Asuntonan Social, Famia, Cuido di nos Grandinan y Salud Publico.
Den e carta e ta bisa lo siguiente:
Ta conoci cu TNO a traha un raportahe riba e calidad di aire relaciona cu e holo di diesel di e generadornan y boilernan na Dr. Horacio Oduber Hospital.
Mirando e importancia di dicho raportahe pa loke ta salud publico di nos isla, no solamente di nos habitantenan, pero tambe di nos bishitantenan cu ta haci uzo di hospital, lo desea di ricibi copia di e raportahe ariba menciona mas pronto cu ta posibel.
Lopez-Tromp ta considera cu e informacion cu e raportahe aki ta contene ta sumamente importante pa asina por haya un claridad di ki indole e situacion tabata(si e tabata e caso) y kico por spera, si esey tabata e caso, na accion di parti di esnan responsabel pa esaki.