ORANJESTAD, Aruba: Gobierno di Aruba a bin un cambio den e reforma fiscal cu ta absolutamente inacceptabel. Loke ta pasando ta cu mientras ta aumenta BBO cu henter pueblo mester paga, cu ta haciendo mas y mas dolor den cartera di e homber chikito, ta reduci e impuesto riba dividendo di 25% pa 10%. Kico esaki ta nifica? Fraccion di AVP ta puntrando.
E personanan cu hopi placa den nos comunidad cu ta cobra dividendo, esta entrada di ganashi di un compania, tabatin e obligacion pa paga 25% na impuesto di e suma cu e lo cobra. Awor e gobierno aki ta reduci e impuesto aki te na 10% pa esunnan cu mas placa den nos comunidad. Y e reduccion aki ta pasa pareu cu e aumento di BBO!
Pues mientras ta subi e impuesto cu ta kibra e homber chikito pasobra tur loke e paga, e mester paga su BBO completo, e comerciante cu tabata paga 25% riba e dividendo, awor lo paga 10%. Pues e pober ta paga mas, mientras e rico ta paga menos. “Awor no compronde mi robes,” asina Parlamentario di AVP, Robert Candelaria a indica. “Mi ta haya great pa un persona cu a inverti y maneha su placa bon y awor e por cobra dividendo y haya e fruta di su trabounan”.
Loke si ta inacceptabel ta cu mientras ta castiga henter e pueblo di Aruba cu amento di BBO cu ta afecta e homber chikito hopi mas tanto den su cartera, ta benificia esunnan cu mas placa den nos comunidad door di reduci nan impuesto. Esaki ta un prueba mas cu e gobierno aki no tin tur “ser humano central”. Friends and family, e sponsor ta haya su beneficio, mientras cu bo ta castiga hopi di esunnan cu a vota pa pone bo den gobierno cu medida tras di medida.
Recientemente e problema di impuesto riba dividendo aki a causa un crisis den gobierno di Hulanda. Gobierno di Hulanda kier a cancela e impuesto completamente pa motibo di empresanan grandi manera Shell y Unilever cu Hulanda kier a haya despues di Brexit. Ora un di e companianan aki a dicidi di no pone su oficina principal na Hulanda, a cambia e decision y no a kita e impuesto riba dividendo mas. Esaki a causa un crisis den coalicion na Hulanda.
Aki ta pushando e mesun problema, pero keto keto pa niun hende lant’e foi suela. “Geen slapende honden wakker maken.” P’esey gobierno di MEPPORRED consistentemente ta mira den spiel patras, purbando di culpa e gobierno anterior pa tur loke nan mes ta causando, mientras ta keda manda medida tras medida pa pueblo y na mes momento yudando friends and family.