Montserat – Dialuna mainta habitantenan di un cas na Montserat a pidi presencia di polis, pa un buraco di bala den nan porta di cas.
Na yegada mesora polisnan a cuminsa haci algun pregunta, pa asina haya sa mas o menos kiko a pasa.
Agentenan no a keda nada otro cu avisa recherche y tambe Cuerpo Tecnico (BFTO), pa asina tuma evidencia. Paden lo a haya e proyectil y esaki a wordo confisca. Paso e momento ey nan no por haci mucho cos mas.
Diadomingo marduga manera nos a trece caba dilanti, durante e marduga di Lighting Parade tawata tin un problema basta serio den Christianstraat.
Christianstraat ta cerca di e adres unda nan a pasa tira.
E marduga ey, dos persona a wordo deteni. Pero a wordo laga liber diadomingo merdia mes.
Posiblemente e tiramento aki ariba e cas tin te maken cu e problema durante weekend.
E area aki Polis tin hopi problema cune, y no ta cos di awor.
Ta varios biaha a tira y hopi detencion a wordo efectua.
Pero ta mustra cu asina mes cu tur e esfuerso di parti autoridad pa tin trankilidad eybanda, toch problema no ta caba.
Segun testigonan, esnan cu a tira posiblemente a pasa den careda di 4’or. Esnan cu a scucha a pensa cu kizas ta den halto nan a tira, paso esey lo ta bastante comun eybanda.
A bin resulta cu no tawata den halto, pero e bala tawata dirigi ariba un cas.