Dadelstraat/ Caya Papa Juan Pablo: Dialuna den careda di 10’or di mainta, a sosode un accidente riba e crusada Dadelstraat cu Caya Papa Juan Pablo, entre un Honda Acura y un Scooter, e manehador di e scooter a keda herida.
E auto maneha pa un cabayero tabata biniendo di pazuid den Dadelstraat pa crusa y sigui bay direccion nort den Dadelstraat.
E scooter maneha pa un cabeyero tabata riba e caminda di preferencia esta Caya Papa Juan Pablo bayendo direccion pabou.
E chauffeur di e Honda Acura pa un of otro motibo no a duna e scooter preferencia y a sali su dilanti. E impacto tabata hopi fuerte cu e manehador di e scooter a keda herida benta riba caminda, su scooter a haya hopi daño material.
Mesora despues di e accidente e chauffeur di e Honda Acura yen miedo a core bandona e sitio y ela manda su mama bay na e sitio. E mes pa un of otro motibo no kier a presenta na e sitio.
E mama kier a tuma over, pero e auto no tabata tin seguro, aparentemente ela caduca basta tempo pasa. E mama di e chauffeur a cuminsa reclama cu un miembro di prensa tabata saca potret, e miembro di prensa a splik’e un cu’e otro, despues e mama a dicidi di coi su telefon y cuminsa filma of saca potret di e amigonan di e herido, e amigonan cu no tin nada di haber den e accidente aki, mesora a lanta cune y aparentemente un di nan lo a pase un wanta y asina cuminsa cu pushamento y zundramento. E polis di trafico na e sitio, mesora a pidi refuerso, pero hopi lilher e agente mes a logra calma e situacion.
E auto a keda confisca y transporta pa warda di polis pa mas investigacion, polis a keda di bay busca e chauffeur di e auto pa e para responsabel pa su actonan.
E manehador di e scooter, kende tabata herida y tabata keha di hopi dolor na su pia y heup, a wordo transporta cu ambulance pa hospital pa un checkeo medico mas avansa.